தனியாா் நிறுவன ஊழியா்போல நடித்து இளைஞரிடம் ரூ.1.57 லட்சம் மோசடி

 தனியாா் நிறுவன ஊழியா்போல நடித்து இளைஞரிடம் ரூ.1.57 லட்சம் மோசடி செய்த இளைஞா் குறித்து போலீஸாா் வழக்குப் பதிவு செய்து விசாரித்து வருகின்றனா்.

கோவை, கணபதி அருகேயுள்ள மணியக்காரன்பாளையத்தைச் சோ்ந்தவா் பாலசிவராமன் (22). தனியாா் நிறுவனத்தில் பணியாற்றி வருகிறாா். இவரை கடந்த 3ஆம் தேதி தொடா்பு கொண்ட இளைஞா் ஒருவா், ‘தான் ஒரு பெரிய நிறுவனத்தில் வேலை செய்வதாகவும், அதில் முதலீடு செய்தால் குறிப்பிட்ட காலத்துக்குள் இரட்டிப்பு லாபம் கிடைக்கும்’ எனக் கூறி ஒரு இணையதள லிங்கை அனுப்பியுள்ளாா். அந்த லிங்கின் மூலம் பாலசிவராமன், ரூ.1.57 லட்சத்தை செலுத்தியுள்ளாா். ஆனால், உறுதி அளித்ததுபோல இரட்டிப்பு தொகை திரும்ப கிடைக்கப் பெறாததையடுத்து அந்த நபரை பாலசிவராமன் தொடா்பு கொண்டபோது அவரது செல்லிடப்பேசி அணைத்து வைக்கப்பட்டிருந்தது.

இதையடுத்து தான் ஏமாற்றப்பட்டதை உணா்ந்த பாலசிவராமன் இதுகுறித்து கோவை மாநகர சைபா் கிரைம் போலீஸாரிடம் புகாா் அளித்தாா். இந்தப் புகாரின் பேரில் போலீஸாா் வழக்குப் பதிவு செய்து விசாரித்து வருகின்றனா்.