அங்கீகாரம் பெற்ற பள்ளிகளில் குழந்தைகளைச் சோ்க்க வேண்டும்

 அரசின் தொடக்க அங்கீகாரம், தொடா் அங்கீகாரம் பெற்ற பள்ளிகளிலேயே குழந்தைகளைச் சோ்க்க வேண்டும் என்று மாவட்ட ஆட்சியா் ஜி.எஸ்.சமீரன் தெரிவித்துள்ளாா்.

இது தொடா்பாக அவா் வெளியிட்டுள்ள செய்திக் குறிப்பு:

பள்ளிக் கல்வித் துறையின் கீழ் செயல்படும் சுயநிதி, நிதியுதவி பெறும் இளம் மழலையா் பள்ளிகள், மழலையா், தொடக்கப் பள்ளிகள், மெட்ரிக். பள்ளிகள் யாவும் இலவச கட்டாயக் கல்வி உரிமைச் சட்டம் 2009இன் படி தொடக்க அங்கீகாரம், தொடா் அங்கீகாரம் இல்லாமல் செயல்படக் கூடாது என்று தெரிவிக்கப்பட்டுள்ளது.

தொடக்க அனுமதி பெற்றுச் செயல்படும் பள்ளிகள் 3 மாதங்களுக்குள் ஆரம்ப அங்கீகாரம் பெற வேண்டும். அவ்வாறு ஆரம்ப அங்கீகாரம் பெறாமல் செயல்படும் பள்ளிகளின் தொடக்க அனுமதி திரும்பப் பெற வேண்டும். மழலையா், இளம் மழலையா் பள்ளிகள் அனுமதி பெற்ற பிறகே தொடங்கப்பட வேண்டும்.

இலவச கட்டாயக் கல்வி உரிமைச் சட்டத்தின்படி, சட்டப்படி அதிகாரம் வழங்கப்பட்டுள்ள அலுவலரின் அங்கீகாரச் சான்று அல்லது ஆணையைப் பெறாமல் அரசு, உள்ளாட்சி அமைப்பு தவிர பிறா் பள்ளிகள் அமைப்பதோ, தொடா்ந்து நடத்துவதோ கூடாது.

மேலும் அதே சட்டத்தின் பிரிவு 18(5) இன் கீழ் அங்கீகாரம் இல்லாமல் செயல்படும் பள்ளிகளுக்கு ரூ.1 லட்சம் வரை அபராதம் விதிக்கப்படுவதுடன், அதைத் தொடா்ந்தும் விதி மீறலுடன் செயல்படும் பள்ளிகளுக்கு தினமும் ரூ.10 ஆயிரம் வரை அபராதம் விதிக்கப்படவும் வாய்ப்பு உள்ளது.

எனவே, கோவை மாவட்டத்தில் தொடக்க அனுமதி, தொடா் அங்கீகாரமின்றி செயல்படும் இளம் மழலையா் பள்ளிகள், மழலையா், தொடக்கப் பள்ளிகள், மெட்ரிக். பள்ளிகளை மூடுவதற்கு நடவடிக்கை மேற்கொள்ளப்படும். மேலும் பெற்றோா்கள் தங்களின் குழந்தைகளை பள்ளியில் சோ்ப்பதற்கு முன்னதாக, அந்தப் பள்ளிகள் தொடக்க, தொடா் அங்கீகாரம் பெற்றிருப்பதை உறுதி செய்து கொள்ள வேண்டும் என்று தெரிவித்துள்ளாா்.