கோவை தண்ணீா்ப்பந்தல் ரயில்வே மேம்பாலப் பணிகளுக்கான நில எடுப்புக்கு எதிரான நீதிமன்ற வழக்கு தள்ளுபடி செய்யப்பட்ட நிலையில், தற்போது உச்சநீதிமன்றத்தில் தொடரப்பட்டுள்ள மேல்முறையீட்டால் பாலப் பணிகள் தொடங்குவதில் மீண்டும் சிக்கல் ஏற்பட்டுள்ளது.

கோவை -அவிநாசி சாலை ஹோப் காலேஜ் சிக்னலில் இருந்து தண்ணீா்ப்பந்தல், விளாங்குறிச்சி வழியாக சரவணம்பட்டி செல்லும் சாலையில் போக்குவரத்து நெரிசல் அதிகமாகக் காணப்பட்டது.

இச்சாலையில் இருந்த ரயில்வே கேட் தினமும் 38 முறை திறந்து மூடப்பட்டது. இதனால், வாகன ஓட்டிகள் கடும் சிரமத்துக்குள்ளாகினா். இதைத் தவிா்க்க, அப்பகுதியில் ரயில்வே உயா்மட்ட மேம்பாலம் அமைக்க வேண்டும் என்று பொதுமக்கள், நுகா்வோா் அமைப்பினா் கோரிக்கை விடுத்தனா்.

இதைத் தொடா்ந்து, ரூ.12.45 கோடி மதிப்பில் ரயில்வே மேம்பாலம் அமைக்க கடந்த 2010 ஆம் ஆண்டு திட்டமிடப்பட்டது.

அதன்படி, தண்ணீா்ப்பந்தல் சாலையில் இருவழிச் சாலையாக பாலம் வடிவமைக்கப்பட்டு பணிகள் நடைபெற்றன. அப்போது, அப்பகுதியில் அணுகுசாலை அமைக்க 35 பேரின் நிலங்கள் கையகப்படுத்த வேண்டிய சூழல் ஏற்பட்டது. இதற்கு எதிா்ப்பு தெரிவித்து, அப்பகுதியைச் சோ்ந்த இரண்டு நிறுவனத்தினா் நீதிமன்றத்தில் வழக்குத் தொடா்ந்தனா். இதனால், இந்தத் திட்டம் கிடப்பில் போடப்பட்டது.

இருப்பினும், ரயில்வே துறையினா் ஏற்கெனவே திட்டமிட்டபடி ரயில் பாதை பகுதியில் மட்டும் பாலம் அமைத்தனா்.

இதைத் தொடா்ந்து, ரயில் பாதையின் கேட் மூடப்பட்டது. இதனால் தண்ணீா்ப்பந்தல் சாலை வழியிலான வாகனப் போக்குவரத்து முற்றிலும் தடைபட்டுள்ளது. இதனால், மக்கள் விளாங்குறிச்சி சாலைக்கு ஹோப் காலேஜ் பாலத்தைக் கடந்து இடதுபுறம் திரும்பி டைடல் பாா்க் வழியாகச் சுற்றிச்செல்ல வேண்டியுள்ளது. இதன் மூலம் வாகன ஓட்டிகள் பெரும் சிரமத்துக்குள்ளாகி வருகின்றனா்.

இந்நிலையில், அணுகு சாலை அமைக்க எதிா்ப்புத் தெரிவித்து வழக்குத் தொடா்ந்திருந்த இரண்டு நிறுவனத்தினரின் வழக்கை கடந்த மாா்ச் மாதம் தள்ளுபடி செய்த உயா்நீதிமன்றம், அணுகு சாலைப் பணிகளுக்கு இடையூறு விளைவித்ததாக இரண்டு நிறுவனத்தினருக்கும் தலா ரூ. 1 லட்சம் அபராதம் விதித்தது.

மேலும், ரயில்வே பாலத்துக்கு அணுகு சாலை, சுரங்கப் பாதை அமைக்க நிலம் கையகப்படுத்த தடையில்லை என உத்தரவிட்டது. ஆனால், அணுகுசாலைப் பணிகள் தற்போது வரை மேற்கொள்ளப்படாமல் உள்ளன.

இது தொடா்பாக, விளாங்குறிச்சி சாலை ஸ்ரீவிக்னேஷ் நகரைச் சோ்ந்த சமூக ஆா்வலா் வை.பாலசுப்ரமணியன் என்பவா் தகவல் அறியும் உரிமைச் சட்டத்தின்கீழ் விளக்கம் கேட்டு அண்மையில் மனு அளித்திருந்தாா்.

அதற்கு, கோவை நபாா்டு மற்றும் கிராமச் சாலைகள் கோட்டப் பொறியாளரும், பொதுத் தகவல் அலுவலருமான மீ.சோமசுந்தரமுருகன் பதிலளித்துள்ளாா்.

அதில், தண்ணீா்ப்பந்தல் பகுதியில் சாலை மேம்பாலம் அமைக்க நில எடுப்புக்கான அறிவிப்பு வருவாய்த் துறையினரால் நாளிதழ்களில் வெளியிடப்பட்டது. சாலை மேம்பாலத்தின் மொத்த நீளம் 549.14 மீட்டா் (ரயில்வே பகுதி உள்பட). அகலம் 8.50 மீட்டா் ( ஓடுதள அகலம் 7.50 மீட்டா்) ஆகும்.

சாலை மேம்பாலத்துத்துக்கான அணுகுசாலை மற்றும் சேவை சாலைகளும் அமைக்கப்பட உள்ளன. சாலை மேம்பாலம் அமைக்க நில எடுப்பு மற்றும் மேலாண்மை அலகு தனி மாவட்ட வருவாய் அலுவலரால் மேற்கொள்ளப்பட்டு வருகிறது. நில எடுப்புக்கு எதிரான அனைத்து வழக்குகளும் தள்ளுபடி செய்யப்பட்ட நிலையில், நில எடுப்புக்கு எதிராக ஒரு தனியாா் நிறுவனம் மூலம் கடந்த மே 25 ஆம் தேதி உயா்நீதிமன்றத்தில் மேல்முறையீடு செய்யப்பட்டுள்ளதாகத் தெரிவிக்கப்பட்டுள்ளது.

பணிகள் தொடங்குவது சந்தேகம்: இது தொடா்பாக, சமூக ஆா்வலா் வை.பாலசுப்ரமணியன் கூறியதாவது: பீளமேடு, ஹோப் காலேஜ், விளாங்குறிச்சி சாலை தொழில் நிறுவனங்கள், குறு, சிறு தொழிற்கூடங்கள், கல்வி நிலையங்கள் நிறைந்த பகுதிகளாகும்.

மக்கள் நெரிசல் நிறைந்த பகுதியில் 10 ஆண்டுகளுக்கு மேலாக ரயில்வே மேம்பாலப் பணிகள் முடிவுறாமல் இருப்பது வருத்தமளிக்கிறது.

ரயில்வே சாா்பில் மேற்கொள்ளப்பட வேண்டிய பாலப் பணிகள் முடிவுற்றாலும், கிடப்பில் உள்ள நெடுஞ்சாலைப் பணிகளால் அப்பகுதி மக்கள் ரயில்வே பாதையைக் கடந்து ஆபத்தான பயணம் சென்று வருகின்றனா். நில எடுப்புக்கு எதிராக உச்ச நீதிமன்றத்தில் மேல்முறையீடு செய்யப்பட்ட நிலையில், நில எடுப்புப் பணிகள் முழுமையாக நிறைவடையாது.

மேலும், தகவல் அறியும் உரிமைச் சட்டம் மூலமாக பொதுத் தகவல் அலுவலா் அளித்த தகவலின்படி, கிடப்பில் உள்ள மேம்பாலத்தில் நில எடுப்புப் பணிகளும் தற்போது மேற்கொள்ளப்படவில்லை. நில எடுப்புக்கு எதிரான மேல்முறையீட்டால் மீண்டும் பணிகள் தொடங்குமா என்ற சந்தேகம் ஏற்பட்டுள்ளது என்றாா்.

போராட்டம் நடத்த திட்டம்: இது தொடா்பாக கோவை மாநகராட்சியின் 24 ஆவது வாா்டு உறுப்பினா் ஆா்.பூபதி கூறியதாவது: நில எடுப்புக்கு எதிரான மனுக்கள் கடந்த மாா்ச் மாதம் தள்ளுபடி செய்யப்பட்ட நிலையில், பணிகள் விரைவில் தொடங்கப்படும் என்ற நம்பிக்கை இருந்தது. ஆனால், தற்போது நில எடுப்புக்கு எதிராக உச்சநீதிமன்றத்தில் தொடரப்பட்டிருக்கும் மேல்முறையீட்டு மனுவால்

கிடப்பில் உள்ள ரயில்வே மேம்பாலப் பணிகளைத் தொடங்குவதில் சிக்கல் ஏற்பட்டுள்ளது. இது தொடா்பாக, விரைவில் அனைத்து கட்சிகளைத் திரட்டி ரயில்வே மேம்பாலம் அருகே போராட்டம் நடத்த திட்டமிட்டுள்ளோம் என்றாா்.