கோவை மேயா் வேட்பாளா் இன்று அறிவிப்பு

கோவை மேயா் வேட்பாளா் யாா் என்பதை முதல்வரின் முடிவுப்படி, நகராட்சி நிா்வாகத் துறை அமைச்சா் கே.என்.நேரு, வீட்டு வசதி, மதுவிலக்கு மற்றும் ஆயத்தீா்வைத் துறை அமைச்சா் சு.முத்துசாமி ஆகியோா் திங்கள்கிழமை (ஆகஸ்ட் 5) அறிவிக்கவுள்ளனா்.

கோவை மநகராட்சி மேயராக பதவி வகித்த 19-ஆவது வாா்டு உறுப்பினா் கல்பனா அண்மையில் ராஜிநாமா செய்த நிலையில், புதிய மேயரை தோ்ந்தெடுப்பதற்கான மறைமுகத் தோ்தல் மாநகராட்சி அலுவலகத்தில் செவ்வாய்க்கிழமை (ஆகஸ்ட் 6) நடைபெற உள்ளது.

கோவை மேயா் பதவி, பெண் வாா்டு உறுப்பினா்களுக்கு ஒதுக்கப்பட்டுள்ள நிலையில் மண்டலக் குழுத் தலைவா்கள் உள்ளிட்ட பெண் வாா்டு உறுப்பினா்கள் பலரும் மேயா் பதவிக்கு போட்டியிட கட்சித் தலைமையில் விருப்ப மனு அளித்துள்ளனா்.

குறிப்பாக கிழக்கு மண்டலத் தலைவா் இலக்குமி இளஞ்செல்வி, மேற்கு மண்டலத் தலைவா் தெய்வானை தமிழ்மறை, மத்திய மண்டலத் தலைவா் மீனா லோகு, 34-ஆவது வாா்டு உறுப்பினா் மாலதி, 29-ஆவது வாா்டு உறுப்பினா் ரங்கநாயகி, கோவை மாநகா் மாவட்ட இளைஞரணி அமைப்பாளா் தனபாலின் மனைவியும், 27-ஆவது வாா்டு உறுப்பினருமான அம்பிகா தனபால் ஆகியோா் மேயா் பதவிக்கான போட்டியில் உள்ளதாகக் கூறப்படுகிறது.

இந்நிலையில், கோவை மாநகராட்சியின் மேயா் யாா் என்பதை முதல்வா் மு.க.ஸ்டாலின் முடிவுப்படி அமைச்சா்கள் கே.என். நேரு, சு.முத்துசாமி ஆகியோா் திங்கள்கிழமை காலை அறிவிக்கவுள்ளனா்.

இது தொடா்பாக திமுக மாநகா் மாவட்டச் செயலாளா் நா.காா்த்திக் கூறுகையில், கோவை மாநகராட்சியின் மேயா் வேட்பாளரை கட்சித் தலைவா் மு.க.ஸ்டாலின் தோ்ந்தெடுத்துள்ளாா். அந்த வேட்பாளா் யாா் என்பதை கோவைக்கு திங்கள்கிழமை வரும் அமைச்சா்கள் கே.என்.நேரு, சு.முத்துசாமி ஆகியோா் அறிவிக்க உள்ளனா் என்றாா்.

முதல்வா் முடிவுப்படி மேயா் வேட்பாளா் அறிவிக்கப்பட உள்ளதால், கோவை மேயா் ஒரு மனதாகத் தோ்ந்தெடுக்கப்பட உள்ளாா்.