பேரிடா் காலங்களில் மத்திய அரசு உதவுவது இல்லை: சீமான்

பேரிடா் காலங்களில் தமிழகத்துக்கு மத்திய அரசு உதவுவது இல்லை என்று நாம் தமிழா் கட்சியின் தலைமை ஒருங்கிணைப்பாளா் சீமான் தெரிவித்தாா்.

இதுகுறித்து அவா் கோவையில் செய்தியாளா்களிடம் வியாழக்கிழமை கூறியதாவது: மக்களுக்கு தவெக தலைவா் விஜய் உதவ நினைப்பதை குறைகூற முடியாது. பாதிக்கப்பட்ட மக்களுக்கு உதவுவதைப் பாராட்ட வேண்டும். எப்போதும் குறை சொல்லிக்கொண்டிருக்க நாங்கள் மன நோயாளிகள் அல்ல.

தமிழகத்தில் பல்வேறு புயல்களால் ஏற்பட்ட பாதிப்புகளுக்கு மத்திய அரசு இதுவரை உரிய நிவாரணம் அளிக்கவில்லை. மாநிலங்கள் தரும் வரியை வைத்துக்கொண்டு பேரிடா் காலங்களில்கூட மத்திய அரசு உதவுவது இல்லை. குஜராத், பிகாா் உள்ளிட்ட மாநிலங்களில் வெள்ள பாதிப்புகளுக்கு மத்திய அரசு உடனடியாக நிதி ஒதுக்கீடு செய்கிறது. இதுகுறித்து கேள்வி கேட்டால் நாட்டுக்கு எதிரானவன் என்கிறாா்கள்.

தோ்தல் ஆணையத்தில் இந்திய அரசமைப்பின்படி பதிவு செய்து கடந்த 13 ஆண்டுகளாக நாம் தமிழா் கட்சியை நடத்தி வருகிறோம். தோ்தலில் 36 லட்சம் வாக்குகளைப் பெற்று தமிழகத்தில் மூன்றாவது தனிப்பெரும் கட்சியாக நாம் தமிழா் கட்சி உள்ளது.

ஆனால், திருச்சி மாவட்ட காவல் கண்காணிப்பாளா் வருண்குமாா் எதனை வைத்து நாம் தமிழா் கட்சியைப் பிரிவினைவாத இயக்கம் என்று சொல்கிறாா் என்பது தெரியவில்லை. தமிழ், தமிழா் என்பது எப்படி பிரிவினைவாதம் ஆகும். அந்த அடிப்படையே அவருக்குத் தெரியவில்லை.

அஸ்ஸாமில் மாட்டிறைச்சிக்கு தடை விதிக்கப்பட்டிருப்பது கேவலமானது. 28 சதவீத மக்கள் இரவு உணவு இல்லாமல் உறங்கச் செல்கிறாா்கள். சொந்த நாட்டு மக்களின் உணவை உறுதிசெய்ய வேண்டும். உணவு, உடை என்பது அவரவா் உரிமை. மாடு புனிதம் என்றால், எதற்காக மாட்டிறைச்சியை ஏற்றுமதி செய்ய வேண்டும் என்றாா்.