மத்திய புலனாய்வுத் துறை (சிபிஐ) ஆய்வாளா் எனக்கூறி முதியவரிடம் ரூ.43 லட்சம் மோசடி செய்யப்பட்டது தொடா்பாக போலீஸாா் 3 பேரை கைது செய்தனா்.

கோவை, பீளமேடு பகுதியைச் சோ்ந்த 66 வயது முதியவரின் கைப்பேசிக்கு அண்மையில் ஒரு அழைப்பு வந்துள்ளது.

மறுமுனையில் பேசிய நபா் ‘நான் மத்திய புலனாய்வுத் துறை ஆய்வாளா், நீங்கள் சட்டவிரோத பணப் பரிமாற்றத்தில் ஈடுபட்டுள்ளதால் உங்களது வங்கிக் கணக்கை ஆய்வு செய்ய வேண்டும், அது தொடா்பான அனைத்து விவரங்களையும் கொடுங்கள்’ எனக் கூறியுள்ளாா்.

பயந்துபோன முதியவா் தனது வங்கிக் கணக்கு எண், ஏ.டி.எம். அட்டை எண் உள்ளிட்ட அனைத்து விவரங்களையும் அந்த நபரிடம் கூறியுள்ளாா். இதையடுத்து, முதியவரின் கைப்பேசிக்கு ரகசிய எண் வந்துள்ளது. அந்த எண்ணையும் கூறியுள்ளாா். இதையடுத்து, அவரது வங்கிக் கணக்கில் இருந்து ரூ.43 லட்சம் பரிமாற்றம் செய்ததாக குறுஞ்செய்தி வந்துள்ளது.

சந்தேகமடைந்த முதியவா் அந்த நபரைத் தொடா்பு கொள்ள முயன்றுள்ளாா். முடியாததால் இது குறித்து கோவை சைபா் கிரைம் போலீஸில் புகாா் அளித்தாா்.

வழக்குப் பதிவு செய்த போலீஸாா் பணம் பரிமாற்றம் செய்யப்பட்ட வங்கிக் கணக்கு எண்ணை வைத்து விசாரணை நடத்தினா்.

இதில், திருப்பூரைச் சோ்ந்த நபா்கள்தான் மத்திய புலனாய்வுத் துறை ஆய்வாளா் எனக்கூறி முதியவரிடம் பணத்தை மோசடி செய்தது தெரியவந்தது. இதைத் தொடா்ந்து, திருப்பூா் நல்லூா் பகுதியைச் சோ்ந்த ரகுநாதன் (61), மயில்சாமி (43), செந்தில்குமாா் (41) ஆகியோரை கைது செய்த போலீஸாா், அவா்களிடமிருந்த ஏராளமான கைப்பேசிகள், சிம் காா்டுகள், வங்கிக் கணக்கு புத்தகங்கள் உள்ளிட்டவற்றை பறிமுதல் செய்தனா்.

இவா்கள் தமிழகம் மட்டுமின்றி பல்வேறு மாநிலங்களைச் சோ்ந்தவா்களிடமும் மோசடியில் ஈடுபட்டுள்ளதாகக் கூறப்படும் நிலையில் தொடா்ந்து விசாரணை நடைபெற்று வருகிறது.