மொடக்குறிச்சி தாலுகா, 46புதூர் ஊராட்சியில் 1,209  கால்நடைகளுக்கான தடுப்பூசி முகாம் திங்கள்கிழமை நடைபெற்றது.
முகாமிற்கு, கால்நடைத் துறை ஈரோடு மண்டல இணை இயக்குநர் கோபால்சாமி தலைமை வகித்தார். மொடக்குறிச்சி எம்.எல்.ஏ. வி.பி.சிவசுப்பிரமணி முகாமைத் தொடக்கிவைத்தார்.
மொடக்குறிச்சி ஒன்றியச் செயலாளர் ஆர்.பி.கதிர்வேல், ஒன்றியக் குழு முன்னாள் துணைத் தலைவர் கணபதி, 46புதூர் முன்னாள் ஊராட்சி மன்றத் தலைவர் ஆர்.பிரகாஷ் ஆகியோர் முன்னிலை வகித்தனர். 
கால்நடைத் துறை உதவி இயக்குநர் பழனிசாமி வரவேற்றார். சட்டப் பேரவை உறுப்பினர் வி.பி.சிவசுப்பிரமணி, முகாமைத் தொடக்கிவைத்து, சிறந்த மாடுகளைத் தேர்வு செய்து அதற்கான பரிசுகளை விவசாயிகளுக்கு வழங்கினார். மாடு, ஆடு, எருமை, கோழி, நாய் உள்ளிட்ட 1,209 கால்நடைகளுக்கு பல்வேறு சிகிச்சைகள் அளிக்கப்பட்டன.  இதில், ஆவின் துணை மேலாளர் வெங்கடாசலம், கால்நடைத் துறை மருத்துவர்கள் தங்கவேல், சக்திவேல் உள்ளிட்டோர் கலந்துகொண்டனர்.