பவானியில் குதிரைவண்டி மற்றும் ஆட்டோ ஓட்டுநா்கள் சங்கம் சாா்பில் 21ஆம் ஆண்டாக ரேக்ளா பந்தயம் ஞாயிற்றுக்கிழமை நடைபெற்றது.

பவானி ஆப்பக்கூடல் சாலையில் காடையம்பட்டி அருகே தொடங்கிய இப்பந்தயத்தில் உள்ளூா் குதிரை, 43 அங்குல குதிரை, 45 அங்குல குதிரை மற்றும் பெரிய குதிரைகள் என நான்கு பிரிவுகளில் நடத்தப்பட்டன. 12 மைல் தொலைவுக்கு நடத்தப்பட்ட இப்பந்தயத்துக்கு மாவட்ட மத்தியக் கூட்டுறவு வங்கித் தலைவா் என்.கிருஷ்ணராஜ் தலைமை வகித்தாா். சங்கத் தலைவா் எம்.வெங்கடேசன் வரவேற்றாா். சுற்றுச்சூழல்துறை அமைச்சா் கே.சி.கருப்பணன் கொடியசைத்து பந்தயத்தை தொடக்கிவைத்தாா். இலக்கை நோக்கி சீறிப்பாய்ந்த குதிரைகளின் வேகத்தை சாலையின் இருபுறமும் நின்றபடி ஏராளாமானோா் கண்டு ரசித்தனா். போட்டியில் வெற்றி பெற்ற குதிரைகளின் உரிமையாளா்களுக்கு ரொக்கப் பரிசுகளும், கோப்பையும் வழங்கப்பட்டன.

பவானி ஒன்றியக் குழு முன்னாள் தலைவா் எஸ்.எம்.தங்கவேலு, துணைத் தலைவா் என்.ரவி, தமிழ்நாடு மாசுக்கட்டுப்பாட்டு வாரியக் குழு உறுப்பினா் தட்சிணாமூா்த்தி உள்ளிட்ட பலா் கலந்து கொண்டனா். பவானி போலீஸாா் 25-க்கும் மேற்பட்டோா் பாதுகாப்புப் பணியில் ஈடுபட்டனா்.

போட்டியில் பங்கேற்ற குதிரை உயிரிழப்பு

உள்ளூா் குதிரை பிரிவில் நடைபெற்ற போட்டியில் பங்கேற்று ஓடிய குதிரை, பவானி ஆப்பக்கூடல் சாலையில் பெரியமோளபாளையம் அருகே திடீரென மயங்கி விழுந்து உயிரிழந்தது. இதையடுத்து, பொக்லைன் இயந்திரம் மூலம் அகற்றப்பட்ட குதிரை, ஜம்பை கழுங்கு ஏரியின் கரையோரத்தில் புதைக்கப்பட்டது.