போக்சோ சட்டத்தில் இரு இளைஞா்கள் கைது

 அந்தியூா் பகுதியைச் சோ்ந்த இரு இளைஞா்கள் போக்சோ சட்டத்தின் கீழ் வியாழக்கிழமை கைது செய்யப்பட்டனா்.

அந்தியூா் அருகே உள்ள சென்னம்பட்டி பகுதியைச் சோ்ந்த 15 வயது பள்ளி மாணவியைக் காணவில்லை என உறவினா்கள் ஜூலை 8ஆம் தேதி வெள்ளிதிருப்பூா் காவல் நிலையத்தில் புகாா் அளித்திருந்தனா். விசாரணையில், அந்தியூரை அடுத்த சென்னம்பட்டி காலனி, கீழ்த்தெருவைச் சோ்ந்த ராஜா மகன் கௌரிசங்கா் (21), மாணவியைத் திருமண ஆசை வாா்த்தை கூறி அழைத்துச் சென்றது கண்டுபிடிக்கப்பட்டது.

கோவை மாவட்டம், அன்னூரில் உள்ள தனியாா் நூற்பாலை குடியிருப்பில் தங்கி கணவன், மனைவி என வேலை செய்து வந்ததும் தெரியவந்தது. இதுகுறித்த புகாரின்பேரில் பவானி அனைத்து மகளிா் போலீஸாா் போக்சோ சட்டத்தின்கீழ் கௌரிசங்கரைக் கைது செய்தனா்.

இதேபோல, பா்கூரை அடுத்த மலைக் கிராமமான ஒந்தனையைச் சோ்ந்தவா் முனுசாமி மகன் மணி (எ) மணிகண்டன் (19). கட்டடத் தொழிலாளியான இவா் கடந்த சில தினங்களுக்கு முன்னா் அந்தியூா் தாசாலியூரைச் சோ்ந்த 17 வயதான சிறுமியைத் திருமண ஆசைவாா்த்தை கூறி கடத்திச் சென்றுள்ளாா்.

இதுகுறித்து, சிறுமியின் பெற்றோா் அளித்த புகாரின்பேரில் அந்தியூா் போலீஸாா் போக்சோ சட்டத்தின்கீழ் மணிகண்டனைக் கைது செய்தனா்.