அத்திக்கடவு - அவிநாசி திட்டம் தாமதம் ஏன்? அமைச்சா் சு.முத்துசாமி விளக்கம்

அத்திக்கடவு-அவிநாசி திட்டம் விதிகளின்படிதான் செயல்படுத்த முடியும் என்று அமைச்சா் சு.முத்துசாமி தெரிவித்துள்ளாா்.

அத்திக்கடவு-அவிநாசி திட்டம் குறித்து சம்பந்தப்பட்ட துறை அலுவலா்களுடனான ஆய்வுக் கூட்டம் ஈரோடு மாவட்ட ஆட்சியா் அலுவலகத்தில் வீட்டுவசதி மற்றும் நகா்ப்புற வளா்ச்சித் துறை அமைச்சா் சு.முத்துசாமி தலைமையில் ஞாயிற்றுக்கிழமை நடைபெற்றது.

கூட்டத்திற்கு பிறகு அமைச்சா் சு.முத்துசாமி செய்தியாளா்களிடம் கூறியதாவது:

அத்திக்கடவு-அவிநாசி திட்டம் காலதாமதமாவதற்கு அரசுதான் காரணம் என்று பொய் செய்தி பரப்பப்படுகிறது. 6 நீரேற்று நிலையங்கள் உள்ள நிலையில் முதல் மூன்று நீரேற்று நிலையங்கள் இடையேயான நிலம் கடந்த ஆட்சி காலத்தில் கையகப்படுத்தப்படாமல் இருந்தது. இந்த நிலத்தைக் கையகப்படுத்த அரசின் சாா்பில் நேரடியாக சென்று அனுமதி கேட்டோம். அதன்பின், அந்த விவசாயிகள் நிலத்தைப் பயன்படுத்தவும், கையகப்படுத்தவும் ஒப்புக்கொண்டனா்.

திட்டத்தின் தொடக்கத்தில் முதல் நீரேற்று நிலையத்தில் இருந்து நிலம் கையகப்படுத்தி இருந்தால் பிரச்னை ஏற்பட்டிருக்காது. திமுக அரசு பொறுப்பேற்ற பிறகுதான் பணிகள் விரைவுபடுத்தப்பட்டு அனைத்தும் நிறைவுசெய்யப்பட்டு கடந்த ஆண்டு சோதனை ஓட்டம் நடத்தப்பட்டது.

அத்திக்கடவு-அவிநாசி திட்டத்தில் நீரை எப்படி பயன்படுத்த வேண்டும் என்ற முறை உள்ளது. இதனை மீறினால் மற்ற பாசனங்களுக்கு பிரச்னை வரும். எனவே, அரசு மிக ஜாக்கிரதையாக செயல்பட்டு வருகிறது. இந்தத் திட்டம் தொடங்குவது குறித்து இதற்கு முன்பு பலமுறை தேதியைக் குறிப்பிட்டதற்கு அதிகாரிகளின் வேலைகளை வேகப்படுத்துவதற்கான முறையே தவிர ஏமாற்றுவதற்காக அல்ல.

விதிகளின்படிதான் இத்திட்டத்தை செயல்படுத்த முடியும். கீழ்பவானி பாசனத்துக்கு தண்ணீா் திறந்துவிட்ட பிறகு, காலிங்கராயன் தடுப்பணைக்கு கசிவுநீா் வந்தபிறகு கண்டிப்பாக அத்திக்கடவு-அவிநாசி திட்டம் முழுமையாக செயல்பாட்டுக்கு வரும். வரும் 15-ஆம் தேதி கீழ்பவானி கால்வாயில் தண்ணீா் திறக்கப்பட உள்ளது. பின்னா், 10 நாள்களுக்குப் பின் காலிங்கராயன் தடுப்பணைக்கு கசிவுநீா் வந்த பிறகு அத்திக்கடவு-அவிநாசி திட்டத்திற்கு தண்ணீா் எடுக்க ஏற்பாடு செய்யப்படும்.

அத்திக்கடவு-அவிநாசி திட்டத்தில் இப்போது உள்ள 1,045 குளங்களுக்கு மேல் கூடுதலாக குளங்களைச் சோ்க்க முடியாது. கூடுதல் குளங்களுக்கு தனி திட்டம்தான் வகுக்க வேண்டும்.

இத்திட்டம் தாமதமாவதற்கான விளக்கத்தை தற்போது கொடுத்துவிட்டேன். எனவே, அண்ணாமலை 20-ஆம் தேதி உண்ணாவிரதம் இருக்கமாட்டாா் என நம்புகிறேன். இப்பிரச்னையில் அரசியல் செய்கிறாா்கள் என்று சொல்லவில்லை, அவா்கள் கோரிக்கை நியாயமானது. இத்திட்டத்தை செயல்படுத்த முடியாததற்கான காரணத்தை உணா்வாா்கள் என நம்புகிறேன்.

காலிங்கராயன் தடுப்பணைக்கு கசிவுநீா் வந்த பிறகும் திட்டத்தில் காலதாமதம் ஏற்பட்டால் நானும் அவா்களுடன் கூடஇருப்பேன். அரசின் விளக்கத்தை ஏற்று அண்ணாமலை உண்ணாவிரதப் போராட்டத்தை ஒத்திவைக்க வேண்டும் என்றாா்.

தொடா்ந்து அத்திக்கடவு-அவிநாசி திட்டம் செயல்படுத்துவது தொடா்பாக சம்பந்தப்பட்ட விவசாயிகளுடன் அமைச்சா் ஆலோசனை மேற்கொண்டாா்.

கூட்டத்தில் மாவட்ட ஆட்சியா் ராஜகோபால் சுன்கரா, மாவட்ட வருவாய் அலுவலா் எஸ்.சாந்தகுமாா், கோட்டாட்சியா்கள் சதீஷ்குமாா், கண்ணப்பன், நீா்வளத் துறை கண்காணிப்பு பொறியாளா் திருமலைகுமாா், செயற்பொறியாளா்கள் நரேந்திரன், சுப்பிரமணியன் உள்ளிட்ட பலா் பங்கேற்றனா்.