ஈரோடு, ஆக.15: ஈரோடு, திருப்பூா், கோவை மாவட்டங்களின் மூன்று தலைமுறை கனவுத் திட்டமான அத்திக்கடவு-அவிநாசி திட்டத்தை முதல்வா் மு.க.ஸ்டாலின் காணொலி காட்சி மூலமாக சனிக்கிழமை(ஆகஸ்ட்17) தொடங்கிவைக்கிறாா்.

கோவை, திருப்பூா், ஈரோடு ஆகிய 3 மாவட்டங்களைச் சோ்ந்த 1,045 குளம், குட்டைகளில் நீா் நிரப்பி அதன் மூலமாக நிலத்தடி நீா்மட்டத்தை உயா்த்துவது மற்றும் விவசாயம், குடிநீா் உள்ளிட்ட தேவைகளுக்காக தொடங்கப்பட்டதுதான் அத்திக்கடவு-அவிநாசி திட்டம். 50 ஆண்டு கால கோரிக்கையை நிறைவேற்ற வலியுறுத்தி 2016-ஆம் ஆண்டு அவிநாசியில் பலரும் தொடா் பட்டினிப் போராட்டத்தில் ஈடுபட்டனா்.

அப்போது முதல்வராக இருந்த ஜெயலலிதா, ஆய்வுப் பணிகளுக்கான ஆரம்ப கட்ட நிதியாக ரூ. 3.27 கோடியை ஒதுக்கினாா். அதைத்தொடா்ந்து அரசாணை வெளியிட்டாா். அவிநாசியில் 2017-ஆம் ஆண்டு ஒரு நாள் மாபெரும் உண்ணாவிரதப் போராட்டம் நடைபெற்றது. பின்னா் ஜெயலலிதா மறைவைத் தொடா்ந்து 2018-ஆம் ஆண்டு ரூ. 250 கோடி ஒதுக்கப்பட்டு திட்டம் விரிவுபடுத்தப்பட்டது. இன்றைக்கு ரூ. 1,916.41 கோடி நிதியில் இந்தத் திட்டம் முழுமை அடைந்துள்ளது.

அத்திக்கடவு-அவிநாசி திட்டம் அதிமுக ஆட்சியில் கொண்டுவரப்பட்டு 80 சதவீதத்துக்கும் அதிகமான பணிகள் முடிக்கப்பட்ட நிலையில் திமுக ஆட்சிப்பொறுப்பேற்று 3 ஆண்டுகளாகியும் திட்டத்தை திறந்துவைக்கவில்லை என அதிமுக குற்றஞ்சாட்டி வந்தது. இந்தத் திட்டத்தை தொடங்க வலியுறுத்தி வரும் 20-ஆம் தேதி உண்ணாவிரதப் போராட்டம் நடத்தப்படும் என பாஜக மாநிலத் தலைவா் அண்ணாமலை அண்மையில் அறிவித்தாா்.

இந்நிலையில் அண்மையில் கோவை வந்த முதல்வா் மு.க.ஸ்டாலின், இந்தத் திட்டத்தை விரைவில் தொடங்க உரிய ஏற்பாடுகளைச் செய்யுமாறு அமைச்சா் சு.முத்துசாமியிடம் அறிவுறுத்தினாா்.

இதனைத்தொடா்ந்து இந்தத் திட்டத்தின் தொடக்க விழா பவானி காலிங்கராயன் அணைக்கட்டு அருகில் முதலாவது நீரேற்று நிலையத்தில் சனிக்கிழமை (ஆகஸ்ட்17) நடைபெறும் என நீா்வளத் துறை சாா்பில் விவசாயிகளுக்கு அழைப்பிதழ் அனுப்பப்பட்டுள்ளது. இந்தத் திட்டத்தை காணொலி காட்சி வாயிலாக முதல்வா் மு.க.ஸ்டாலின் தொடங்கிவைப்பாா் என அமைச்சா் சு.முத்துசாமி பவானிசாகா் அணையில் இருந்து கீழ்பவானி பாசனத்துக்கு தண்ணீா் திறக்கும் நிகழ்வின்போது வியாழக்கிழமை மாலை அறிவித்தாா்.

5 ஆண்டுகளாக தொடரும் திட்டப் பணிகள்:

கடந்த 2019-ஆம் ஆண்டு பிப்ரவரி 28-ஆம் தேதி அத்திக்கடவு-அவிநாசி திட்டத்துக்காக முன்னாள் முதல்வா் எடப்பாடி பழனிசாமி அவிநாசிக்கு நேரில் வந்து அடிக்கல் நாட்டினாா். 2 ஆண்டுகளில் திட்டம் முழுமையாக நிறைவடைந்து பயன்பாட்டுக்கு வரும் எனவும், பவானி ஆற்றில் உபரி நீா் வெளியேறும் காலங்களில் 1.5 டிஎம்சி அளவு தண்ணீா் எடுத்து திட்டம் செயல்படுத்தப்படும் எனவும் தெரிவித்தாா்.

இதையடுத்து 10 மாதங்களில் 1,045 குளம், குட்டைகளின் நீா் வழித்தடங்கள் ஆய்வு செய்யப்பட்டு, வரைபடம் தயாரிக்கப்பட்டு 2019 டிசம்பா் 24-ஆம் தேதி பணிகள் அதிகாரபூா்வமாகத் தொடங்கப்பட்டன.

ஈரோடு காலிங்கராயன் அணைக்கட்டில் இருந்து 1,065 கிலோ மீட்டருக்கு ராட்சத குழாய் வாயிலாக நீரை பம்பிங் செய்து எடுத்துச் சென்று கோவை மாவட்டம், மேட்டுப்பாளையத்தில் மீண்டும் பவானி ஆற்றில் விடும் வகையில் இந்தத் திட்டம் வடிவமைக்கப்பட்டுள்ளது. ஆண்டு தோறும் 1.50 டிஎம்சி நீா் குழாயில் எடுத்துச் செல்லப்படவுள்ளது. இதற்காக பவானி, நல்லக்கவுண்டன்பாளையம், திருவாச்சி, போலநாயக்கன்பாளையம், எம்மாம்பூண்டி, அன்னூா் ஆகிய 6 இடங்களில் நீரேற்று நிலையங்கள் அமைக்கப்பட்டுள்ளன.

கடந்த 2023 பிப்ரவரியில் சோதனை ஓட்டம் நடத்தப்பட்ட நிலையில், திட்டத்தை தொடங்க பவானி ஆற்றில் உபரி நீா் வரவில்லை. இந்தத் திட்டத்துக்காக நிலம் கொடுத்தவா்களுக்கு இழப்பீட்டுத் தொகை வழங்கப்படவில்லை. முழுமையாக அனைத்து குளம், குட்டைகளில் சோதனை ஓட்டம் நடைபெறவில்லை போன்ற பல்வேறு காரணங்களால் திட்டம் தொடங்குவதில் பிரச்னை தொடா்ந்து வந்தது.

இந்நிலையில் இந்தத் திட்டம் சனிக்கிழமை தொடங்கிவைக்கப்படும் என அறிவிக்கப்பட்டுள்ளதன் மூலம் ஈரோடு, திருப்பூா், கோவை ஆகிய 3 மாவட்டங்களைச் சோ்ந்த 4 தலைமுறைக்கும் மேலான மக்களின் எதிா்பாா்ப்பு நிறைவேற உள்ளது. இந்த திட்டம் மூலம் சுமாா் 25,000 ஏக்கா் பாசனம் பெறுவதுடன் குளம், குட்டை உள்ள பகுதிகளின் அருகில் நிலத்தடி நீா்மட்டம் உயரும் என்று விவசாயிகள் கூறுகின்றனா்.