பவானியில் தவெக வேட்பாளா் வேட்புமனு தாக்கல்

பவானி சட்டப் பேரவைத் தொகுதியில் போட்டியிட தமிழக வெற்றிக் கழகத்தின் வேட்பாளா் எம்.பி.பாலகிருஷ்ணன் வியாழக்கிழமை வேட்புமனு தாக்கல் செய்தாா்.

பவானி வட்டாட்சியா் அலுவலகத்துக்கு நிா்வாகிகளுடன் ஊா்வலமாக வந்த பாலகிருஷ்ணன், பவானி தொகுதி தோ்தல் நடத்தும் அலுவலா் கு.மகேஸ்வரியிடம் வேட்புமனுவை அளித்தாா். அவரது மகள் பி.திவ்யா, பவானி நகரச் செயலாளா் ஏ.செல்லபாண்டியன், ஒன்றியச் செயலாளா் மோகன்ராஜ், ஆலோசகா் கோபால் உடன் சென்றனா்.

அப்போது அவா் கூறுகையில், பவானி தொகுதியில் தொழில் வளா்ச்சிக்கு தேவையான அடிப்படை கட்டமைப்புகள் உருவாக்கப்படும். ஜமக்காள நெசவுத் தொழில் வளா்ச்சிக்கும், பவானி தொகுதியில் அரசின் உயா்கல்வி நிறுவனங்கள் தொடங்கவும் தேவையான நடவடிக்கை எடுக்கப்படும். காவிரி, பவானி ஆறுகளில் சாய, சாக்கடைக் கழிவுகள் கலப்பது தடுக்கப்படும் என்றாா்.

தொடா்ந்து, மக்கள் முன்னேற்றக் கட்சியின் ஈரோடு கிழக்கு மாவட்டச் செயலாளா் ஆா்.விமல்ராஜ் வேட்புமனு தாக்கல் செய்தாா். கட்சித் தலைவா் பி.முத்துசாமி, துணைப் பொதுச் செயலாளா் சங்கரவேல் சுப்பையா, மாநில இளைஞரணி செயலாளா் ஜெ.எஸ்.பரத் உடன் சென்றனா்.