கூடலூர் பகுதிகளில் ரூ. 1.75 கோடி மதிப்பீட்டில் வளர்ச்சிப் பணிகள்:  ஆட்சியர் ஆய்வு

கூடலூர் நகராட்சி,  ஊராட்சி ஒன்றியப் பகுதிகளில்  பொதுப் பணித் துறை, மாவட்ட ஊரக வளர்ச்சி முகமை ஆகியவை சார்பில் ரூ. 1.75 கோடி மதிப்பில் நிறைவேற்றப் பணிகளையும், மேற்கொள்ளப்பட்டு வரும் பணிகளையும் மாவட்ட ஆட்சியர் இன்னசென்ட் திவ்யா செவ்வாய்க்கிழமை நேரில் ஆய்வு செய்தார்.
கூடலூர் நகராட்சிக்கு உள்பட்ட  ஏழுமுறம் பகுதியில் பொதுப் பணித் துறையின் நீர்வள ஆதார அமைப்பின் சார்பில் சட்டப் பேரவை உறுப்பினர்தொகுதி மேம்பாட்டு நிதியிலிருந்து ரூ.10 லட்சம் மதிப்பில் கான்கிரீட் தடுப்பணை கட்டப்பட்டுள்ளது.  நந்தன்கொல்லி முதல் காலம்புழா வரை ரூ.3 லட்சம் மதிப்பில் தடுப்புச் சுவர் கட்டப்பட்டுள்ளது. சிறீமதுரை ஊராட்சிக்கு உள்பட்ட  கம்மாத்தி முதல் புத்தூர்வயல் வரை ஊரக சாலை மேம்பாட்டு திட்டத்தின் கீழ் ரூ.35 லட்சம் மதிப்பில்  சாலை மேம்படுத்தப்பட்டுள்ளது. மகாத்மா காந்தி தேசிய ஊரக வேலை உறுதித் திட்டத்தின் கீழ் ரூ.8.32 லட்சம் மதிப்பில் செம்முண்டி பழங்குடியினர் காலனி பகுதியில் கான்கிரீட் நடைபாதை அமைக்கப்பட்டுள்ளது. பிரதமர் ஆவாஸ் யோஜனா திட்டத்தின் கீழ் ரூ.1.7 லட்சம்  மதிப்பில் செம்முண்டியில் வீடு கட்டி முடிக்கப்பட்டுள்ளது. நிறைவேற்றப்பட்டுள்ள மேற்கண்ட பணிகளைஆட்சியர் பார்வையிட்டார்.
மேலும்,  சிறீமதுரை ஊராட்சிக்கு உள்பட்ட கோழிக்கண்டியில் ரூ.30 லட்சம் மதிப்பில் கட்டப்பட்டு வரும் பழங்குடியினர்களுக்கான 12 வீடுகளையும், மகாத்மா காந்தி தேசிய ஊரக வேலை உறுதி திட்டத்தின் கீழ்  ரூ.1.34 லட்சம் மதிப்பில் குண்டூர் பகுதியில் நடைபெற்றும் அகழி வெட்டும் பணியினையும், தூய்மை பாரத இயக்கத் திட்டத்தின் கீழ் மணிமூலாவில் ரூ.1.8 லட்சம் செலவில் கட்டப்பட்டு வரும் 15 தனிநபர் கழிப்பிடங்களையும், ஒருங்கிணைந்த ஒப்படைக்கப்பட்ட  வருவாய் திட்டத்தின் கீழ் சேரங்கோடு ஊராட்சிக்கு உள்பட்ட பண்டப்பில்லா முதல் உண்டிகடவு வரை ரூ.18.5 லட்சம் மதிப்பில் அமைக்கப்படும்   கான்கிரீட் சாலை பணியினையும், தாய் திட்டத்தின் கீழ் ரூ.21.2 லட்சம் மதிப்பில் காவயல் பகுதியில் கட்டி முடிக்கப்பட்ட சிறுபாலத்தையும்,  தாய் திட்டத்தின் கீழ் ரூ.25.1 லட்சம் மதிப்பில் நெலாக்கோட்டை ஊராட்சிக்கு உள்பட்ட பிதர்காடு பஜார் முதல் செம்பகபாடி ஆரம்ப சுகாதார நிலையம் வரை அமைக்கப்பட்ட சாலையையும், தாய் திட்டத்தின் கீழ் ரூ.8 லட்சம் மதிப்பில் பாலப்பள்ளி பழங்குடியினர் காலனியில் நிறைவேற்றப்பட்ட குடிநீர் வழங்குதல் பணியினையும், சட்டப் பேரவை  உறுப்பினர் மேம்பாட்டு நிதியிலிருந்து ரூ.10 லட்சம் மதிப்பில்  சேரம்பாடியில் முடிக்கப்பட்ட கிணற்று பம்ப் அறை, தண்ணீர்க் குழாய் அமைக்கும் பணியையும் ஆட்சியர் ஆய்வு செய்தார். மொத்தம் ரூ.1.75 கோடி மதிப்பிலான வளச்சிப் பணிகளை ஆட்சியர் நேரில் ஆய்வு செய்தார்.
மாவட்ட ஊரக வளர்ச்சி முகமைத் திட்ட இயக்குநர் பாபு,  ஊராட்சிகளின் உதவி இயக்குநர்  காசிநாதன் உள்ளிட்டோர் உடனிருந்தனர்.