திருப்பூா் மாநகரில் பொலிவுறு நகரம் திட்டத்தின்கீழ் மேற்கொள்ளப்பட்டு வரும் பணிகளை விரைந்து முடிக்க வேண்டும் என்று அதிகாரிகளுக்கு அமைச்சா் உடுமலை கே.ராதாகிருஷ்ணன் அறிவுறுத்தியுள்ளாா்.

திருப்பூா் மாவட்ட ஆட்சியா் அலுவலகத்தில் பொலிவுறு நகரம் திட்டத்தின்கீழ் மேற்கொள்ளப்பட்டு வரும் பணிகள் தொடா்பான ஆய்வுக் கூட்டம் ஆட்சியா் க.விஜயகாா்த்திகேயன் முன்னிலையில் புதன்கிழமை நடைபெற்றது. கூட்டத்துக்கு தலைமை வகித்து கால்நடை பராமரிப்புத் துறை அமைச்சா் உடுமலை கே.ராதாகிருஷ்ணன் பேசியதாவது:

திருப்பூா் மாவட்டத்தில் உள்ள மாநகராட்சி, நகராட்சிகள், பேரூராட்சிகள் மற்றும் ஊராட்சி ஒன்றியத்துக்கு உள்பட்ட கிராம ஊராட்சிப் பகுதிகளில் பல்வேறு வளா்ச்சித் திட்டப் பணிகள் சிறப்புடன் மேற்கொள்ளப்பட்டு வருகின்றன.

திருப்பூா் மாநகராட்சிக்கு உள்பட்ட பகுதியின் வளா்ச்சிக்காக விரிவடைந்த பகுதிகளில் குடிநீா் அபிவிருத்தித் திட்டம், திறந்தவெளி காலியிடம் மேம்பாடு செய்தல், ஒருங்கிணைந்த மேலாண்மை மற்றும் கட்டுப்பாட்டு மையம், புதிய குடிநீா் திட்டப் பணிகள், பாதாள சாக்கடை திட்டப் பணிகள், மாநாட்டு அரங்கம் கட்டுதல், நவீன பேருந்து நிலையம், பல அடுக்கு வாகனம் நிறுத்துமிடம் உள்ளிட்ட பல்வேறு பணிகளுக்காக பொலிவுறு நகரம் திட்டத்தின்கீழ் ரூ.1,029.91 கோடி ஒதுக்கீடு செய்யப்பட்டுள்ளது. இதையடுத்து, பணிகள் தற்போது முழுவீச்சில் நடைபெற்று வருகின்றன. இந்தப் பணிகளை விரைந்து முடிக்க அதிகாரிகள் நடவடிக்கை எடுக்க வேண்டும் என்றாா்.

கூட்டத்தில், சட்டப் பேரவை உறுப்பினா்கள் சு.குணசேகரன் (திருப்பூா் தெற்கு), கே.என்.விஜயகுமாா் (திருப்பூா் வடக்கு), மாநகர காவல் ஆணையா் ஜி.காா்த்திகேயன், மாவட்ட வருவாய் அலுவலா் கு.சரவணமூா்த்தி, மாநகராட்சி ஆணையா் க.சிவகுமாா், மாநகர காவல் துணை ஆணையா் சுரேஷ்குமாா், மாநகர பொறியாளா் ரவி, உதவி திட்ட மேலாளா் (கணினி) சௌதாமணி, மண்டல உதவி ஆணையா்கள், மாநகராட்சி அலுவலா்கள் உள்ளிட்ட பலா் கலந்து கொண்டனா்.