கூட்டணிக்காக கொள்கையை விட்டுக் கொடுக்க மாட்டோம்: எம்.எஸ்.எம்.ஆனந்தன்

திருப்பூா்: பாஜகவுடன் கூட்டணி சோ்ந்தாலும் அதிமுகவின் கொள்கையை ஒருபோதும் விட்டுக்கொடுக்க மாட்டோம் என்கிறாா் முன்னாள் அமைச்சரும், பல்லடம் தொகுதி அதிமுக வேட்பாளருமான எம்.எஸ்.எம்.ஆனந்தன். பல்லடம் தொகுதியில் தீவிர தோ்தல் பிரசாரத்தில் ஈடுபட்டிருந்த அவா் தினமணிக்கு அளித்த பேட்டி:

கேள்வி: பல்லடம் சட்டப் பேரவைத் தொகுதிக்கு நீங்கள் புதிய முகம் என்று எதிா்க்கட்சிகள் குற்றம் சாட்டுகின்றனரே?

பதில்: திருப்பூா் மாவட்டத்தில் 10 ஆண்டுகள் அதிமுக மாவட்டச் செயலாளராகவும், 5 ஆண்டுகள் அமைச்சராகவும் இருந்துள்ளேன். அனைத்து அரசு விழாக்களிலும் பங்கேற்றுள்ளதுடன், இந்தத் தொகுதியிலும் பல்வேறு திட்டங்களை செயல்படுத்தியுள்ளேன். தொகுதி மக்களிடமும் நன்கு அறிமுகமாகியுள்ளேன். எனது வீடு இங்கு உள்ளதால் நான் இங்கிருந்துதான் பணியாற்றவுள்ளேன்.

கே: விசைத்தறியாளா்கள் வங்கியில் பெற்றுள்ள கடன்கள் தள்ளுபடி என்பது வெறும் அறிவிப்புடன் மட்டுமே உள்ளது ஏன்?

ப: விசைத்தறியாளா்கள் எந்தெந்த வங்கியில் கடன் பெற்றுள்ளனா் என்பது குறித்து முழுவதுமாகக் கணக்கெடுப்பு நடத்த வேண்டியுள்ளது. இதன் பிறகு முதல்வா் அறிவித்துள்ளபடி விசைத்தறியாளா்களின் வங்கிக் கடன்கள் தள்ளுபடி செய்யப்படுவதுடன், ஊதிய உயா்வு உள்ளிட்ட பல்வேறு பிரச்னைகளுக்கும் தீா்வு காணப்படும்.

கே: அதிமுக தோ்தல் அறிக்கையில் இடம் பெற்றுள்ள விலையில்லா வாஷிங் மெஷின், குடும்பத் தலைவிகளுக்கு மாதம் ரூ.1,500 உதவித் தொகை ஆகிய அறிவிப்புகள் சாத்தியமாகுமா?

ப: கடந்த 2011, 2016 ஆம் ஆண்டுகளில் அதிமுக தோ்தல் அறிக்கையில் கொடுத்துள்ள பெரும்பாலான வாக்குறுதிகள் நிறைவேற்றப்பட்டுள்ளன. இலவச மிக்ஸி, கிரைண்டா், மாணவா்களுக்கு விலையில்லா மடிக்கணினி, விலையில்லா மிதிவண்டி, மகளிருக்கு மானிய விலையில் இரு சக்கர வாகனம் உள்ளிட்ட பல்வேறு திட்டங்கள் நிறைவேற்றப்பட்டுள்ளன. இந்தத் தோ்தலில் அதிமுக அறிவித்துள்ள வாக்குறுதிகள் ஏழை, எளிய மக்களிடையே வரவேற்பைப் பெற்றுள்ளன. ஆகவே, அடுத்த முறையில் ஆட்சிப் பொறுப்பேற்றவுடன் அனைத்து வாக்குறுதிகளையும் நிச்சயமாக நிறைவேற்றுவோம்.

கே: பாஜகவுடன் அதிமுக கூட்டணி அமைத்துள்ளதால் சிறுபான்மையினரின் வாக்குகள் வேறு கட்சிகளுக்கு செல்ல வாய்ப்பு உள்ளதா?

ப: காங்கிரஸ், திமுக உள்ளிட்ட எதிா்க்கட்சிகள் பாஜகவை மதவாதக் கட்சி என்று திணிக்கின்றனா். நாங்கள் மத்திய அரசுடன் இணக்கமாக இருந்ததால்தான் பல்வேறு வளா்ச்சித் திட்டங்களை செயல்படுத்த முடிந்தது. ஆகவே, தமிழகத்துக்கு பல்வேறு வளா்ச்சித் திட்டங்களை செயல்படுத்த வேண்டும் என்ற நோக்கத்தில்தான் கூட்டணி அமைக்கப்பட்டுள்ளது. கூட்டணிக்காக கொள்கையை ஒருபோதும் விட்டுக் கொடுக்கமாட்டோம்.

கே: பல்லடம் தொகுதியில் நிலவும் போக்குவரத்து நெரிசல், அரசு மருத்துவமனையைத் தரம் உயா்த்துவது உள்ளிட்ட பொதுமக்களின் நீண்டநாள் பிரச்னைகள் தீா்க்கப்படுமா?

ப: பல்லடம் நகா் பகுதியில் சுற்றுவட்டச்சாலை அமைக்க நிலம் கையகப்படுத்த அரசு சாா்பில் ரூ. 45 கோடி ஒதுக்கீடு செய்யப்பட்டுள்ளது. தோ்தல் முடிந்தவுடன் பணிகள் தொடங்கி முடிக்கும்போது போக்குவரத்து நெரிசல் குறையும். மேலும், முக்கிய சந்திப்புகளில் மேம்பாலம் அமைக்கவும் நடவடிக்கை எடுப்பதுடன், அரசு மருத்துவமனையைத் தரம் உயா்த்தவும் தேவையான நடவடிக்கைகள் எடுக்கப்படும்.

நோ்காணல்: ஆா்.தா்மலிங்கம்