பதற்றமான வாக்குச் சாவடிகளில் பணிபுரியும் நுண் பாா்வையாளா்களுக்குப் பயிற்சி

திருப்பூா் மாவட்டத்தில் உள்ள 124 பதற்றமான மற்றும் இக்கட்டான வாக்குச் சாவடி மையங்களில் பணிபுரிய உள்ள நுண் பாா்வையாளா்களுக்கான பயிற்சி வகுப்பு சனிக்கிழமை நடைபெற்றது.

திருப்பூா் மாவட்ட ஆட்சியா் அலுவலகத்தில் நடைபெற்ற பயிற்சி வகுப்புக்கு தோ்தல் பொதுப் பாா்வையாளா்கள் ரவிசங்கா் பிரசாத், சந்தா்பிரகாஷ் வா்மா, உமானந்த டோலி, மாஷீா் ஆலம், கபில் மீனா ஆகியோா் முன்னிலை வகித்தனா். பயிற்சி வகுப்புக்கு தலைமை வகித்த மாவட்ட தோ்தல் அலுவலரும், ஆட்சியருமான க.விஜயகாா்த்திகேயன் பேசியதாவது:

இந்திய தோ்தல் ஆணையத்தால் தமிழக சட்டப் பேரவை பொதுத் தோ்தல் 2021 அறிவிக்கப்பட்டவுடன் அரசியல் கட்சியினா் மற்றும் வேட்பாளா்களை கண்காணிப்பதற்காக பொதுப் பாா்வையாளா்கள், காவல் பாா்வையாளா்கள் மற்றும் செலவினப் பாா்வையாளா்கள் நியமிக்கப்பட்டுள்ளனா்.

திருப்பூா் மாவட்டத்தில் உள்ள 8 சட்டப் பேரவைத் தொகுதிகளில் 124 வாக்குச் சாவடி மையங்கள் பதற்றமான மற்றும் இக்கட்டானவை எனக் கண்டறியப்பட்டுள்ளது. இந்த வாக்குச் சாவடிகளை கண்காணிப்பதற்காக வங்கி மற்றும் மத்திய அரசுப் பணியாளா்கள் 168 போ் நுண் பாா்வையாளா்களாக நியமிக்கப்பட்டுள்ளனா். இவா்கள் அந்தந்த வாக்குச் சாவடிகளுக்கான அனைத்து முன்னேற்பாடு பணிகளை மேற்கொள்ள உள்ளனா். மேலும், பதற்றமான வாக்குச் சாவடிகளை கண்காணித்து நேரடியாக பொதுப் பாா்வையாளருக்கு தகவல்களை அளிக்க உள்ளனா். அதேவேளையில், அனைத்து நுண் பாா்வையாளா்களும் தங்களுக்கு ஒதுக்கப்பட்டுள்ள வாக்குச் சாவடிகளின் அனைத்து விவரங்களையும் அறிந்து வைத்திருக்க வேண்டும்.

நுண் பாா்வையாளா்கள் வாக்குப் பதிவு நாளில் மாதிரி வாக்குப் பதிவு நடத்தி மின்னணு வாக்குப் பதிவு இயந்திரங்கள் சரியான முறையில் உள்ளது என உறுதி செய்து கொள்ள வேண்டும். வாக்குச் சாவடி முகவா்கள் தங்களது அடையாள அட்டை சரியானதா எனவும், வாக்காளா்கள் வாக்களிக்க வரும்போது தோ்தல் அடையாள அட்டை அல்லது தோ்தல் ஆணையத்தால் அறிவுறுத்தப்பட்ட 11 வகையான அடையாள அட்டைகள் மூலம் வாக்களிக்கவும் வழிவகை செய்ய வேண்டும் என்றாா்.

இதில், மாவட்ட வருவாய் அலுவலா் சரவணமூா்த்தி, மாவட்ட முன்னோடி வங்கி மேலாளா் அலெக்சாண்டா், தோ்தல் வட்டாட்சியா் ச.முருகதாஸ் உள்ளிடட அதிகாரிகள் உடனிருந்தனா்.