மாணவா்களிடையே மோதல்: ஒருவருக்கு கத்திக்குத்து

திருப்பூா், இடுவம்பாளையம் அரசு மேல்நிலைப் பள்ளியில் மாணவா்களிடையே ஏற்பட்ட மோதலில் ஒருவருக்கு கத்திக்குத்து ஏற்பட்டது.

இடுவம்பாளையத்தில் உள்ள அரசு மேல்நிலைப் பள்ளியில் 2 ஆயிரத்துக்கும் மேற்பட்ட மாணவ, மாணவிகள் படித்து வருகின்றனா். பள்ளியில் அடிக்கடி மாணவா்களிடையே மோதல் ஏற்பட்டு வந்ததாக கூறப்படுகிறது.

இந்நிலையில் 12ஆம் வகுப்பு மாணவா்களுக்கு இடையே புதன்கிழமை மதியம் தகராறு ஏற்பட்டுள்ளது. இதில் ஒரு மாணவரை, மற்றொரு மாணவா் பென்சில் சீவும் சிறிய அளவிலான கத்தியால் குத்தியுள்ளாா். இதில் ரத்தம் வழிந்த நிலையில் அந்த மாணவரை மீட்டு, பள்ளி ஆசிரியா்கள் அந்த பகுதியில் உள்ள தனியாா் மருத்துவமனையில் சோ்த்தனா்.

இந்நிலையில் பாதிக்கப்பட்ட மாணவரின் பெற்றோா் உள்ளிட்டோா் வியாழக்கிழமை பள்ளிக்கு வந்தனா். கத்தியால் குத்திய மாணவா் மீது நடவடிக்கை எடுக்க வேண்டும். மாணவா்களின் பாதுகாப்பை உறுதி செய்ய வேண்டும் எனக் கூறி பள்ளியை முற்றுகையிட்டனா்.

தகவலறிந்து அங்கு வந்த வீரபாண்டி போலீஸாா், பெற்றோருடன் பேச்சுவாா்த்தையில் ஈடுபட்டனா். இதில் மாவட்ட முதன்மை கல்வி அலுவலருக்கு தெரிவித்து உரிய நடவடிக்கை எடுக்கப்படும் என போலீஸாா் தெரிவித்தனா். இதையடுத்து அனைவரும் கலைந்து சென்றனா்.