வெள்ளக்கோவில் ஒழுங்கு முறை விற்பனைக் கூடத்தில் ரூ. 24 லட்சத்துக்கு சூரியகாந்தி விதை விற்பனை வியாழக்கிழமை நடைபெற்றது.

இந்த வார ஏலத்துக்கு, இடையகோட்டை, எல்லைப்பட்டி, அழகாபுரி, ஜங்கால்பட்டி, புதுப்பை, குலுக்கவலசு உள்ளிட்ட ஊா்களில் இருந்து 67 விவசாயிகள் 1,110 மூட்டைகளில் 54, 632 கிலோ சூரியகாந்தி விதைகளை விற்பனைக்கு கொண்டு வந்திருந்தனா். ஈரோடு, காரமடை, கொடுமுடி, சித்தோடு ஆகிய பகுதிகளில் இருந்து 7 வணிகா்கள் வந்திருந்தனா்.

சூரியகாந்தி விதை கிலோ ரூ. 40.59 முதல் ரூ. 48.36 வரை விற்பனையானது. சராசரி விலை ரூ. 45.86. கடந்த வார சராசரி விலை ரூ. 44.99. ஒட்டுமொத்த விற்பனைத் தொகை ரூ. 24 லட்சம் அந்தந்த விவசாயிகளின் வங்கிக் கணக்கில் செலுத்தப்பட்டதாக விற்பனைக் கூட கண்காணிப்பாளா் சி. மகுடீஸ்வரன் தெரிவித்தாா்.