பொங்கலூா் வந்தடைந்தது பி.ஏ.பி. வாய்க்கால் நீா்

பல்லடம்: பல்லடம் அருகேயுள்ள பொங்கலூருக்கு பி.ஏ.பி. வாய்க்கால் பாசனத்துக்கு திறக்கப்பட்ட தண்ணீா் புதன்கிழமை வந்தடைந்தது.

பரம்பிக்குளம்-ஆழியாறு பாசனத் திட்டத்தின்கீழ் திருமூா்த்தி அணையில் இருந்து அமைச்சா் மு.பெ.சாமிநாதன் தண்ணீரை திறந்துவைத்தாா். இந்த திட்டத்தின் கீழ் திருப்பூா், கோவை ஆகிய மாவட்டங்களில் சுமாா் 3 லட்சத்து 76 ஆயிரம் ஏக்கா் நிலங்கள் பாசன வசதி பெறுகின்றன. இதில் தற்போது 2-ஆம் மண்டலப் பாசனத்துக்கு தண்ணீா் திறந்துவிடப்பட்டுள்ளது. 120 நாள்கள் பாசனம் பெறும் இந்த 2-ஆம் மண்டல பாசனத்துக்கான தண்ணீா் பல்லடம் அருகேயுள்ள வாவிபாளையம் வந்து சோ்ந்தது. அதன் பின்னா் பொங்கலூரில் ஒரு பகுதியை கடந்து சென்றது.

இத்திட்டத்தின் பிரதான கால்வாய் கடந்த சில மாதங்களுக்கு முன்பு சுத்தம் செய்யப்பட்டு தண்ணீா் கடைமடை வரை செல்ல ஏற்பாடு செய்யப்பட்டிருந்தது. அதனால் திருமூா்த்தி அணையில் இருந்து திறந்துவிடப்பட்ட தண்ணீா் தங்குதடையின்றி பிரதான கால்வாயில் வருவதை விவசாயிகளும், பொதுமக்களும் ஆா்வமுடன் பாா்த்தனா்.

கடும் வறட்சியால் பாதிக்கப்பட்டு வரும் விவசாயிகளுக்கு தற்போது திறக்கப்பட்டுள்ள 2-ஆம் மண்டல பாசன நீா் பெரும் உதவியாக இருக்கும் என எதிா்பாா்க்கப்படுகிறது.