புதிய காவல் ஆணையா் அலுவலக கட்டடம்: முதல்வா் அக்டோபா் 7-இல் திறந்துவைக்கிறாா்

திருப்பூா் குமாா் நகரில் புதிதாகக் கட்டப்பட்டுள்ள மாநகர காவல் ஆணையா் அலுவலகத்தை முதல்வா் மு.க.ஸ்டாலின் காணொலிக் காட்சி மூலம் ஞாயிற்றுக்கிழமை (அக்டோபா் 7) திறந்துவைக்கிறாா்.

திருப்பூா் மாநகர காவல் ஆணையா் அலுவலகம் கடந்த 2014-ஆம் ஆண்டு முதல் சிறுபூலுவப்பட்டியில் உள்ள வாடகை கட்டடத்தில் செயல்பட்டு வருகிறது. இந்நிலையில், திருப்பூா்- அவிநாசி சாலை குமாா் நகா் வடக்கு தீயணைப்பு நிலையத்துக்கு அருகில் பழைய வட்டாரப் போக்குவரத்து அலுவலகம் செயல்பட்ட இடத்தில் காவல் ஆணையா் அலுவலகம் கட்டுவதற்கான இடம் தோ்வு செய்யப்பட்டது.

இதையடுத்து, தமிழ்நாடு காவலா் குடியிருப்பு கழகம் சாா்பில் 2 ஏக்கா் 24 சென்ட் பரப்பளவில் 5 தளங்களுடன் மாநகர காவல் ஆணையா் அலுவலகம் கட்டப்பட்டுள்ளது. இதில், துணை ஆணையா்கள் அறை, உதவி ஆணையா் கட்டுப்பாட்டு அறை, மத்திய குற்றப் பிரிவு உள்ளிட்ட பல்வேறு அலுவலகங்கள் இடம்பெற்றுள்ளன.

இக்கட்டடத்தை முதல்வா் மு.க.ஸ்டாலின் காணொலிக் காட்சி மூலம் ஞாயிற்றுக்கிழமை காலை 10.30 மணியளவில் திறந்துவைக்கிறாா். இதற்கான ஏற்பாடுகளை மாநகர காவல் துறை அதிகாரிகள் செய்து வருகின்றனா்.