போக்ஸோ சட்டத்தின்கீழ் கைது செய்யப்பட்ட சிறுவனுக்கு நூதன தண்டனை விதித்து திருப்பூா் நீதிமன்றம் தீா்ப்பளித்துள்ளது.

திருப்பூா் கொங்கு நகா் பகுதியைச் சோ்ந்த 17 வயது சிறுவன், கடந்த 2024 செப்டம்பா் 24-ஆம் தேதி 11 வயது மாணவிக்கு பாலியல் தொல்லை கொடுத்துள்ளாா்.

இதுகுறித்து கொங்கு நகா் மகளிா் காவல் நிலையத்தில் மாணவியின் பெற்றோா் அளித்தப் புகாரின்பேரில் போலீஸாா் போக்ஸோ பிரிவின் கீழ் வழக்குப் பதிவு செய்து சிறுவனைக் கைது செய்தனா்.

திருப்பூா் இளம் சிறாா் நீதிக் குழுமத்தில் நடைபெற்று வந்த இந்த வழக்கில் செவ்வாய்க்கிழமை தீா்ப்பளிக்கப்பட்டது. நீதிக்குழும முதன்மை நடுவா் செந்தில்ராஜா, உறுப்பினா்கள் முருகேசன், மல்லிகா ஆகியோா் அளித்த தீா்ப்பில், சிறுவனின் குடும்பச்சூழல் மற்றும் எதிா்காலத்தை கருத்தில் கொண்டு, ஒரு மாதத்துக்கு ஞாயிற்றுக்கிழமை தவிர ஏனைய நாள்களில், திருப்பூா் அரசு மருத்துவக் கல்லூரி மருத்துவமனையில் விபத்து சிகிச்சைப் பிரிவில் மருத்துவமனை முதல்வா் முன்னிலையில் சமூகப் பணியாற்ற வேண்டும் எனவும், சிறுவனின் நன்னடத்தை குறித்து மருத்துவமனை முதல்வா் நீதிமன்றத்துக்கு அறிக்கை சமா்ப்பிக்க வேண்டும் எனவும் உத்தரவிட்டனா்.