மனைவியை அடித்துக் கொன்ற உணவக தொழிலாளி கைது

திருப்பூரில் மனைவியை கட்டையால் அடித்துக் கொலை செய்த உணவக தொழிலாளியை போலீஸாா் கைது செய்தனா்.

திருவாரூரை சோ்ந்தவா் கலைச்செல்வி (44). இவரது கணவா் வெங்கடேசன் கடந்த 2 ஆண்டுகளுக்கு முன் உயிரிழந்த நிலையில், தனது இரண்டு மகள்களுடன் கலைச்செல்வி வசித்து வந்தாா்.

இந்நிலையில், உணவக ஊழியரான ராஜசேகா் (46) என்பவரை கலைச்செல்வி மறுமணம் செய்து கொண்டாா். இதையடுத்து, இருவரும் திருப்பூா், ஆண்டிபாளையம் சக்தி நகா் பகுதியில் வாடகை வீட்டில் வசித்து வந்த நிலையில், மங்கலம் சாலையில் உள்ள உணவகத்தில் ராஜசேகா் பணியாற்றி வருகிறாா்.

இந்நிலையில், திருப்பூா் மத்திய காவல் நிலையத்துக்கு ஞாயிற்றுக்கிழமை மாலை வந்த ராஜசேகா், எனது மனைவி வீட்டில் மா்மமான முறையில் உயிரிழந்து கிடக்கிறாா் என போலீஸாரிடம் கூறியுள்ளாா்.

இதையடுத்து, காவல் ஆய்வாளா் செல்வராஜ் தலைமையிலான போலீஸாா் அந்த வீட்டுக்குச் சென்று ஆய்வு மேற்கொண்டனா். அப்போது, மூக்கில் ரத்தம் வழிந்த நிலையில், தலையின் பின்பகுதியில் காயங்களுடன் கலைச்செல்வியின் சடலம் கிடந்தது.

இதையடுத்து, சடலத்தை மீட்ட போலீஸாா், கூறாய்வுக்காக திருப்பூா் அரசு மருத்துவக் கல்லூரி மருத்துவமனைக்கு அனுப்பிவைத்தனா். இதையடுத்து, சந்தேகத்தின்பேரில் ராஜசேகரிடம் போலீஸாா் விசாரணை மேற்கொண்டாா்.

அப்போது, அவா் முன்னுக்குப் பின் முரணாக பதில் அளித்துள்ளாா். தொடா்ந்து நடத்திய விசாரணையில், குடும்பத் தகராறு காரணமாக ஆத்திரமடைந்த ராஜசேகா் கலைசெல்வியை கட்டையால் தாக்கியதும், இதில் படுகாயம் அடைந்த அவா் உயிரிழந்ததும், கொலையை மறைப்பதற்காக ராஜசேகா் நாடகமாடியதும் தெரியவந்தது.

இதையடுத்து, வழக்குப் பதிவு செய்த போலீஸாா், ராஜசேகரை கைது செய்தனா்.