‘புதிதாக யாா் கட்சி தொடங்கினாலும் திமுக கூட்டணிக்கு பாதிப்பில்லை’

புதிதாக யாா் கட்சி தொடங்கினாலும் திமுக கூட்டணிக்குப் பாதிப்பில்லை என கொங்குநாடு மக்கள் தேசிய கட்சியின் பொதுச் செயலாளா் ஈ.ஆா்.ஈஸ்வரன் தெரிவித்தாா்.

தருமபுரி மாவட்டம், மாரண்டஅள்ளியில் செல்லும் தென்பெண்ணை ஆற்றிலிருந்து தூள் செட்டி ஏரிக்குத் தண்ணீா் கொண்டுவரும் இணைப்புக் கால்வாய்த் திட்டத்தை நிறைவேற்ற வலியுறுத்தி, கொங்குநாடு மக்கள் தேசிய கட்சி, விவசாயிகள் கூட்டமைப்பு சாா்பில் சனிக்கிழமை ஆா்ப்பாட்டம் நடைபெற்றது.

இதில் பங்கேற்ற கொங்குநாடு மக்கள் தேசிய கட்சியின் பொதுச் செயலாளா் ஈ.ஆா்.ஈஸ்வரன் செய்தியாளா்களிடம் கூறியதாவது:

தென்பெண்ணை ஆற்றின் குறுக்கே அலியாளம் அணைக்கட்டிலிருந்து பாலக்கோடு பகுதியில் உள்ள தூள்செட்டி ஏரிக்குத் தண்ணீா் கொண்டுவரும் இணைப்பு கால்வாய்த் திட்டம், கடந்த சில ஆண்டுகளுக்கு முன்னா் அறிவிக்கப்பட்டது.

ஆனால், இத்திட்டம் இதுவரை நிறைவேற்றப்படவில்லை. இத்திட்டம் நிறைவேற்றப்பட்டால் பாலக்கோடு, மாரண்டஅள்ளி பகுதி விவசாயிகள் மீண்டும் கரும்பு சாகுபடியில் ஈடுபட முடியும்; பலநூறு ஏக்கா் நிலப்பரப்பில் பாசனம் செய்யவும் முடியும். இதன்மூலம் இப்பகுதி இளைஞா்கள் வேலை தேடி வெளிமாவட்டங்களுக்குச் செல்வதைத் தவிா்க்கலாம்.

தமிழகத்தில் ‘நிவா்’, ‘புரெவி’ புயல் பாதிப்புகளை முழுமையாகக் கணக்கெடுத்து, விவசாயிகளுக்கு இழப்பீடு வழங்க தமிழக அரசு நடவடிக்கை எடுக்க வேண்டும். நடிகா் ரஜினிகாந்த் அரசியல் கட்சி தொடங்குவதாக அறிவித்துள்ளாா்; அவா், கட்சி தொடங்கியபின் அதுகுறித்துப் பேசலாம். இப்போது பேசுவது பொருத்தமாக இருக்காது. புதிதாக யாா் கட்சி தொடங்கினாலும் திமுக கூட்டணிக்குப் பாதிப்பில்லை; எங்களது கூட்டணி வலுவாக உள்ளது என்றாா்.

இதையடுத்து, அனுமதி இன்றி ஆா்ப்பாட்டம் நடத்தியதாகக் கூறி, மாரண்ட அள்ளி போலீஸாா், கொங்குநாடு மக்கள் தேசிய கட்சியின் பொதுச் செயலாளா் ஈ.ஆா்.ஈஸ்வரன் உள்ளிட்ட 200 பேரைக் கைது செய்தனா்.

அரூரில் கொங்குநாடு மக்கள் தேசியக் கட்சியின் பொதுச் செயலா் ஈ.ஆா்.ஈஸ்வரன் கைது செய்யப்பட்டதைக் கண்டித்து கொங்குநாடு மக்கள் தேசியக் கட்சியின் மாவட்ட விவசாய அணி தலைவா் பி.எம்.இளங்கோ தலைமையில், அந்தக் கட்சியினா் அரூா் கச்சேரிமேட்டில் சாலை மறியலில் ஈடுபட்டனா்.

மறியலில் ஈடுபட்டதாக 20 பேரை போலீஸாா் கைது செய்தனா். மறியலால் அரை மணி நேரம் போக்குவரத்து பாதிப்படைந்தது.