கரோனா தொற்றுக்கு உயிரிழந்த மின் வாரிய பணியாளா்களின் குடும்பத்துக்கு இழப்பீடு வழங்க வேண்டும் என தருமபுரி தொகுதி சட்டப் பேரவை உறுப்பினா் எஸ்.பி.வெங்கடேஸ்வரன் வலியுறுத்தினாா்.

தருமபுரி மாவட்டம், அதியமான்கோட்டை துணை மின் நிலையத்தில் தருமபுரி தொகுதி பாமக சட்டப் பேரவை உறுப்பினா் எஸ்.பி.வெங்கடேஸ்வரன் புதன்கிழமை ஆய்வு மேற்கொண்டாா். அப்போது அவா் கூறியதாவது:

பேரிடா் காலங்களில் தொடா்ந்து களத்தில் பணியாற்றும் மின் வாரிய பணியாளா்களை முன்களப் பணியாளா்களாக அறிவிக்க வேண்டும். கரோனா தீநுண்மி தொற்றால் உயிரிழந்த மின்வாரிய பணியாளா்களின் குடும்பத்தினருக்கு இழப்பீடு வழங்க வேண்டும். காலியாக உள்ள பணியிடங்களை நிரப்ப நடவடிக்கை எடுக்க வேண்டும் என்றாா்.

உதவி செயற்பொறியாளா் இந்திராணி, உதவி பொறியாளா்கள் பசுபதி, ஸ்ரீதா், கவிதா, பாமக மாவட்டச் செயலா் பெரியசாமி, முன்னாள் மாவட்டச் செயலா் பெ.சண்முகம், ஒன்றியக் குழு உறுப்பினா் முருகன், மின்வாரிய பாமக தொழிற்சங்கச் செயலா் சின்னசாமி உள்ளிட்டோா் உடனிருந்தனா்.