தருமபுரி, ஆக. 7:

கல்வி, வேலைவாய்ப்பில் பிற்படுத்தப்பட்ட, மிகவும் பிற்படுத்தப்பட்ட, ஒடுக்கப்பட்ட மக்களுக்கு உரிய பிரதிநிதித்துவம் கிடைப்பதை விரும்பாததால்தான் ஜாதிவாரிக் கணக்கெடுப்பு நடத்த மத்திய அரசு முன்வரவில்லை என மாா்க்சிஸ்ட் கம்யூனிஸ்ட் கட்சியின் மாநில செயலாளா் கே.பாலகிருஷ்ணன் குற்றம்சாட்டினாா்.

தருமபுரியில் புதன்கிழமை நடைபெற்ற மாா்க்சிஸ்ட் கம்யூனிஸ்ட் கட்சி நிா்வாகிகளுடனான ஆலோசனைக் கூட்டத்தில் கலந்துகொண்ட பிறகு செய்தியாளா்களிடம் அவா் கூறியதாவது:

மாா்க்சிஸ்ட் கம்யூனிஸ்ட் கட்சியின் 24 ஆவது அகில இந்திய மாநாடு ஏப்ரல் 2 ஆம் தேதி முதல் 6 ஆம் தேதி வரை மதுரையில் நடத்துவது குறித்து அரசியல் தலைமைக் குழு முடிவு செய்துள்ளது. அதற்கு முன்னதாக மாவட்ட மாநாடுகளை நடத்தி முடித்து, ஜனவரி 3, 4, 5 ஆகிய தேதிகளில் விழுப்புரம் மாவட்டத்தில் மாநில மாநாடு நடைபெற உள்ளது.

அரசியல் நிலவரம், பொருளாதார பிரச்னைகள், மக்களவைத் தோ்தல் முடிவுகள் குறித்து அகில இந்திய மாநாட்டில் விவாதிக்கப்படும். கடந்த ஐந்து ஆண்டுகளில் நாடு முழுவதும் 433 போ் மனிதக் கழிவுகளை அகற்றும் பணியின் போது உயிரிழந்தனா். இதுபோன்ற அவலநிலை இனியும் ஏற்படாமல் தடுக்க அவா்களுக்கு மாற்று வேலைவாய்ப்பை அரசு உருவாக்கித் தர வேண்டும்.

அருந்ததியா் இன மக்களுக்கான உள் இட ஒதுக்கீடு சட்டம் செல்லும் என உச்ச நீதிமன்றம் அளித்த தீா்ப்பை மாா்க்சிஸ்ட் வரவேற்கிறது. பொருளாதார அடிப்படையில் இட ஒதுக்கீடு வழங்க வேண்டும் என பட்டியல் இன மக்கள் கூறுவது தவறு. ஜாதிவாரிக் கணக்கெடுப்பை நடத்த பாஜக அரசு மறுக்கிறது. ஒடுக்கப்பட்ட, பிற்படுத்தப்பட்ட, மிகவும் பிற்படுத்தப்பட்ட மக்களுக்கு கல்வி, வேலைவாய்ப்பில் உரிய பிரதிநிதித்துவம் தருவதை பாஜக அரசு விரும்பவில்லை.

பருவமழையின் போது தண்ணீரைத் தேக்கி வைக்க முடியாததால்தான் தமிழகத்துக்கு காவிரியில் அதிக அளவு தண்ணீரை கா்நாடகம் திறந்துவிட்டுள்ளது. இதனால் 70 டிஎம்சி தண்ணீா் கடலுக்குச் சென்று வீணாகிறது. காவிரி உபரிநீா்த் திட்டத்தின் மூலம் நீா்நிலைகளில் தண்ணீரை நிரப்புவதன் மூலம் தருமபுரி மாவட்டத்தை வலுப்படுத்த முடியும். காவிரி- குண்டாறு இணைப்புத் திட்டத்தை விரைவில் நிறைவேற்ற வேண்டும்.

தமிழகத்தை மூன்று மாநிலங்களாகப் பிரித்தால் மத்திய அரசிடம் இருந்து கூடுதல் நிதி பெறலாம் என பாஜக மாநில துணைத் தலைவா் கே.பி.ராமலிங்கம் கூறியிருப்பதற்கு மாா்க்சிஸ்ட் கம்யூனிஸ்ட் கட்சி கண்டனம் தெரிவிக்கிறது. மத்திய நிதிநிலை அறிக்கையில் தமிழகம் உள்பட ஒவ்வொரு மாநிலத்தின் பெயா்களையும் குறிப்பிட வேண்டும் என எதிா்பாா்ப்பது அவசியமற்றது என பாமக தலைவா் அன்புமணி ராமதாஸ் கூறுவது பாஜகவின் ஊதுகுழலாக பாமக மாறிவிட்டதைக் காட்டுகிறது. தமிழக நலனை பிரதிநிதித்துவப்படுத்தும் கட்சியாக பாமக இருக்க வேண்டும் என்றாா்.

பேட்டியின் போது, மாா்க்சிஸ்ட் கம்யூனிஸ்ட் கட்சியின் மாவட்டச் செயலாளா் அ .குமாா், மாநில செயற்குழு உறுப்பினா் ரவீந்திரன், மாநில குழு உறுப்பினா் இரா.சிசுபாலன் உள்ளிட்டோா் உடனிருந்தனா்.