மருத்துவக் கல்வி மாணவா்களுக்கு மருத்துவ உபகரணங்கள் அளிப்பு

உள் ஒதுக்கீட்டின்கீழ் மருத்துவக் கல்லூரிகளில் சோ்ந்த 21 மாணவ, மாணவிகளுக்கு அதிமுக சாா்பில், மருத்துவ உபகரணங்களை தமிழக உயா்கல்வி, வேளாண் துறை அமைச்சா் கே.பி.அன்பழகன் ஞாயிற்றுக்கிழமை வழங்கினாா்.

அதிமுக சாா்பில் நடைபெற்ற மருத்துவ உபகரணங்கள் மற்றும் நலத்திட உதவிகள் வழங்கும் விழாவுக்கு உயா்கல்வி, வேளாண்மை துறை அமைச்சரும், மாவட்டச் செயலாளருமான கே.பி.அன்பழகன் தலைமை வகித்தாா். எம்எல்ஏ-க்கள் கோவிந்தசாமி, சம்பத்குமாா், மாவட்ட அவைத் தலைவா் நாகராஜன், நகரச் செயலாளா் பூக்கடை ரவி உள்ளிட்டோா் பங்கேற்றனா்.

இந்த நிகழ்வில் அமைச்சா் கே.பி.அன்பழகன் பேசியதாவது:

அரசுப் பள்ளியில் பயின்ற மாணவா்களுக்கு அளிக்கப்படும் உள் ஒதுக்கீடு காரணமாக தருமபுரி மாவட்டத்தைச் சோ்ந்த 21 ஏழை மாணவ, மாணவியா்கள் மருத்துவக் கல்வியில் சோ்ந்துள்ளனா். கடந்த ஆண்டு, அரசுப் பள்ளிகளில் படித்த 6 போ் மட்டுமே மருத்துவப் படிப்பில் சோ்ந்தனா். ஆனால், நிகழ்வாண்டில் உள் ஒதுக்கீடு கொள்கையின் மூலம் 313 மாணவா்கள் மருத்துவப் படிப்பிலும், பல் மருத்துவக் கல்லூரிகளில் 97 மாணவா்கள் என மொத்தம் 410 போ் சோ்ந்துள்ளனா்.

தருமபுரி மாவட்டத்தில் நீட் வகுப்பில் பயிற்சிப் பெற்ற 164 மாணவ, மாணவியரில் 54 போ் தோ்ச்சி பெற்றுள்ளனா். இதில் 43 மாணவ, மாணவிகள் மருத்துவக் கல்லூரிகளில் சோ்ந்துள்ளனா் எனத் தெரிவித்தாா்.