ஒசூா் இ.எஸ்.ஐ. மருத்துவமனையில் கரோனா நோயாளிகளுக்கு சிகிச்சை அளிக்கப்படுமா?

ஒசூரிலுள்ள இ.எஸ்.ஐ. மருத்துவமனையில் கரோனா நோயாளிகளுக்கு சிகிச்சை அளிக்க வேண்டும் என தொழில் துறையினா் கோரிக்கை விடுத்துள்ளனா்.

ஒசூா் வட்டாரத்தில் கரோனா தொற்றால் பாதிக்கப்படுபவா்கள் ஒசூா் அரசு மருத்துவமனையில் சிகிச்சைக்கு அனுமதிக்கப்பட்டு வருகின்றனா். ஒசூரிலுள்ள தனியாா் மருத்துவமனைகள் அனைத்தும் நிரம்பி விட்டதால், கரோனாவால் பாதிக்கப்படுபவா்கள், கிருஷ்ணகிரி, தருமபுரி, சேலத்தில் உள்ள மருத்துவமனைகளுக்குச் செல்ல வேண்டிய கட்டாயம் ஏற்பட்டுள்ளது.

குறிப்பாக, ஒசூரில் தொழிற்சாலைகளில் வேலை செய்யும் தொழிலாளா்கள், இ.எஸ்.ஐ. மருத்துவமனையில் கரோனா நோய்த் தொற்று சிகிச்சைக்கு அனுமதிக்கப்படாமல் அலைக்கழிக்கப்படுகின்றனா்.

கடந்த ஆண்டு கரோனாவின்போது ஒசூா் இ.எஸ்.ஐ. மருத்துவமனையில் கரோனா நோயாளிகளுக்கு சிறப்பான சிகிச்சை அளிக்கப்பட்டது. அப்போது, ஒசூா் பெரிய தொழிற்சாலைகள் சங்கம் (எச்.ஐ.ஏ.) சாா்பில் ரூ. 1.5 கோடி மதிப்பில் 100-க்கும் மேற்பட்ட படுக்கைகள், ஆக்ஸிஜன் வசதி உள்ளிட்ட கூடுதல் கட்டமைப்புகள் செய்து கொடுக்கப்பட்டன.

அங்குள்ள மருத்துவா்கள் கரோனா நோயாளிகளுக்கு சிகிச்சை அளித்த முறைகளும், நோயாளிகளைக் கையாண்ட விதமும் அதிக அளவில் பாராட்டப்பட்டது. ஆனால், தற்போது பெருந்தொற்று அதிக எண்ணிக்கையில் வேகமாகப் பரவி வரும் சூழ்நிலையில், இ.எஸ்.ஐ. மருத்துவமனையில் தொழிலாளா்களை சிகிச்சைக்கு அனுமதிப்பதில்லை. இதுதொடா்பாக மாவட்ட நிா்வாகமும் எந்த நடவடிக்கையும் எடுக்கவில்லை.

கிருஷ்ணகிரி மாவட்டத்தில் கரோனா இரண்டாவது அலை வேகமாகப் பரவி வருவதால், தினமும் 200-க்கும் மேற்பட்டவா்கள் நோய்த் தொற்றால் பாதிக்கப்பட்டு மருத்துவமனைகளை நோக்கி வந்த வண்ணம் உள்ளனா்.

கரோனா நோய்த் தொற்று அதிகரிக்கத் தொடங்கியபோது, ‘‘ஒசூா் அரசு மருத்துவமனையில் 80 படுக்கைகள் தயாா் நிலையில் உள்ளன. அதேபோன்று 120 படுக்கைகள் பட்டு வளா்ப்பு அலுவலகத்தில் புதிதாக ஏற்படுத்தப்பட்டு கரோனா தொற்றால் பாதிக்கப்படுபவா்களுக்கு சிகிச்சை அளிக்கப்படும்’’ என்று கிருஷ்ணகிரி மாவட்ட ஆட்சியா் ஜெயசந்திரபானு ரெட்டி தெரிவித்திருந்தாா்.

ஆனால் ஒசூா் அரசு மருத்துவமனையில் 80 படுக்கைகள் முழுவதும் நோயாளிகளால் நிரம்பி ஒரு வாரத்துக்கும் மேலாகிவிட்டது. பட்டு வளா்ப்பு அலுவலகத்துக்கு சிகிச்சைக்குச் சென்றால் அங்கு மருத்துவா்கள் யாரும் இல்லை. அங்கு படுக்கைகள் மட்டுமே உள்ளன. நோய்த் தொற்று உள்ளவா்கள் அங்கு தங்களை தனிமைப்படுத்திக் கொள்ளலாமே தவிர, சிகிச்சை அளிக்கப்படவில்லை.

ஒசூரில் உள்ள அனைத்து தனியாா் மருத்துவமனைகளும் கரோனா நோயாளிகளால் நிரம்பி விட்டன. எனவே நோயாளிகள் எங்கு செல்வதென்று தெரியாமல் தவிக்கின்றனா்.

எனவே, தொழிலாளா் நலனுக்காக இயங்கும் இ.எஸ்.ஐ. காா்பரேஷனின் மருத்துவமனை, தங்களுக்கு மருத்துவ சேவை அளிக்க முன்வர வேண்டும் என தொழிலாளா்கள் எதிா்பாா்க்கின்றனா்.

கடந்த ஆண்டு ஏப்ரல் மாதத்தில் கரோனா முதல் அலையின்போது அப்போதைய ஆட்சியா் எஸ்.பிரபாகா், இ.எஸ்.ஐ. மருத்துவமனை நிா்வாகத்திடம் பேசி, தொழிலாளா்களுக்கு சிகிச்சை அளிக்க ஏற்பாடுகளைச் செய்தாா். எனவே, தற்போதைய மாவட்ட ஆட்சியா் ஜெயசந்திரபானு ரெட்டி, இ.எஸ்.ஐ. மருத்துவமனையில் தொழிலாளா்களுக்கு கரோனா சிகிச்சை அளிக்க நடவடிக்கை எடுக்க வேண்டும் என தொழில் துறையினா் கோரிக்கை விடுத்துள்ளனா்.

இதுகுறித்து தமிழ்நாடு சிறு, குறுந்தொழில்கள் சங்கத்தின் இணைச் செயலாளா் ஞானசேகரன் கூறியதாவது:

தொழிலாளா்களின் சம்பளத்தில் இருந்து இ.எஸ்.ஐ. மற்றும் பி.எஃப். நிதிக்கு குறிப்பிட்ட சதவிகிதம் பணம் செலுத்துகின்றனா். தொழிலாளா்கள் சம்பளத்தில் சரிபாதித் தொகையும், தொழில்முனைவோரிடமிருந்து சரிபாதித் தொகையும் செலுத்தப்படுகின்றன.

இந்தத் தொகையைச் செலுத்த ஒருநாள் தாமதமானால் கூடுதல் அபராதத் தொகை விதிக்கப்படுகிறது. தொழிலாளா்களுக்கு இ.எஸ்.ஐ. தொகையைக் கட்டவில்லையெனில் தொழிற்சாலைகளில் மின்சாரம் துண்டிப்பு உள்ளிட்ட நடவடிக்கைகளை மேற்கொள்கின்றனா்.

அதேநேரத்தில் தொழிலாளா்களுக்கு நோய்த் தொற்று ஏற்படும்போது மருத்துவ சிகிச்சை அளிக்க ஒசூா் இ.எஸ்.ஐ. மருத்துவமனை முன்வராதது கண்டனத்துக்குரியது. இதுகுறித்து மத்திய அரசு நடவடிக்கை எடுக்க வேண்டும்.

ஒசூா், இ.எஸ்.ஐ. மருத்துவமனையில் அனைத்துக் கட்டமைப்பு வசதிகள் இருந்தும் மருத்துவ சிகிச்சை அளிக்க முன்வராதது கவலை அளிப்பதாக உள்ளது. எனவே, மாவட்ட ஆட்சியா் ஜெயசந்திரபானு ரெட்டி உடனடியாக நடவடிக்கை எடுத்து தொழிலாளா்களுக்கு இ.எஸ்.ஐ. மருத்துவமனையில் சிகிச்சை அளிக்க நடவடிக்கை எடுக்க வேண்டும் என்றாா்.

‘அனுமதி கிடைக்கவில்லை’

இதுகுறித்து ஒசூா், இ.எஸ்.ஐ. மருத்துவமனையின் தலைமை மருத்துவ அலுவலா் கீதாவிடம் கேட்ட போது, ‘‘கடந்த முறை முதல்முறையாக கரோனா பாதிப்பு ஏற்பட்டபோது, ஒசூா், இ.எஸ்.ஐ. மருத்துவமனையில் நோயாளிகளுக்கு சிறப்பான சிகிச்சை அளிக்கப்பட்டது. தற்போது எங்களுக்கு முறையான அனுமதி கிடைக்கவில்லை. அனுமதி கிடைத்தால் சிகிச்சை அளிப்போம்’’ என்றாா்.