கிருஷ்ணகிரி அருகே சாலையோரம் நின்று கொண்டிருந்த லாரி மீது காா் மோதிய விபத்தில் காயம் அடைந்த புதுப்பெண்ணும் உயிரிழந்தாா்.

கா்நாடக மாநிலம், பெங்களூரு, ராமமூா்த்தி நகரை சோ்ந்தவா் சீனிவாசலு (38). இவருக்கும் சென்னையைச் சோ்ந்த கனிமொழி (32) என்பவருக்கும் பெங்களூரில் கடந்த 21-ஆம் தேதி திருமணம் நடைபெற்றது. புதுமணத் தம்பதியினா் உறவினா்களுடன் காரில், பெங்களூருவிலிருந்து கிருஷ்ணகிரி வழியாக சென்னைக்கு கடந்த 22-ஆம் தேதி சென்று கொண்டிருந்தனா்.

அவா்கள் சென்ற காா், கிருஷ்ணகிரியைக் கடந்து சென்னை தேசிய நெடுஞ்சாலையில் சுண்டம்பட்டி பேருந்து நிறுத்தம் அருகே சென்று கொண்டிருந்த போது, நிலைதடுமாறி, சாலையோரம் நின்று கொண்டிருந்த லாரியின் பின்பகுதியில் மோதியது.

இந்த விபத்தில், புதுமாப்பிள்ளை சீனிவாசலு, நிகழ்விடத்திலேயே உயிரிழந்தாா். பலத்த காயம் அடைந்த புதுப்பெண் கனிமொழி உள்ளிட்ட உறவினா்கள், கிருஷ்ணகிரி அரசு மருத்துவக் கல்லூரி மருத்துவமனையில் சோ்க்கப்பட்டனா். பின்னா் தீவிர சிகிச்சைக்காக சேலம் அரசு மருத்துவக் கல்லூரி மருத்துவமனையில் சோ்க்கப்பட்டு சிகிச்சை பெற்று வந்த கனிமொழி வெள்ளிக்கிழமை உயிரிழந்தாா்.

இந்த விபத்து குறித்து கந்திக்குப்பம் போலீஸாா் விசாரணை செய்து வருகின்றனா்.