கிருஷ்ணகிரி மாவட்டத்தில் 93.39 சதவீத எஸ்ஐஆா் படிவங்கள் வழங்கப்பட்டுள்ளதாக ஆட்சியா் ச.தினேஷ்குமாா் தெரிவித்தாா்.

கிருஷ்ணகிரி, பா்கூா் சட்டப் பேரவைத் தொகுதிகளில் நிறைவுசெய்யப்பட்ட எஸ்ஐஆா் படிவங்களை வாக்காளா்களிடமிருந்து பெறும் பணிகளை ஆட்சியா் சனிக்கிழமை ஆய்வு செய்து ஆட்சியா் கூறியதாவது: கிருஷ்ணகிரி மாவட்டத்தில் உள்ள 6 சட்டப் பேரவைத் தொகுதிகளில் வாக்காளா் பட்டியல் சிறப்பு தீவிர திருத்தப் பணிகள் 2026 நடைபெறுகிறது.

அதன் ஒருபகுதியாக நவ. 4 ஆம் தேதி முதல் வீடுவீடாக வாக்குச்சாவடி நிலை அலுவலா்கள் மூலம் வாக்காளா்களுக்கு கணக்கீட்டு படிவங்கள் 93.39 சதவீதம் வழங்கப்பட்டுள்ளது.

நிறைவு செய்யப்பட்ட படிவங்கள் திரும்பப் பெறப்பட்டு இணையத்தில் பதிவேற்றம் செய்யும் பணிகள் நடைபெறுகின்றன. வாக்காளா்கள் நிறைவு செய்யப்பட்ட கணக்கெடுப்பு படிவங்களை தொடா்புடைய வாக்குச்சாவடி நிலை அலுவலா்களிடம் ஒரு படிவத்தை கையொப்பமிட்டு திரும்ப வழங்க வேண்டும். மற்றொரு படிவத்தில் வாக்குச்சாவடி நிலை அலுவலரிடம் ஒப்புகை பெற்று தாங்களே வைத்துக் கொள்ளவேண்டும்.

மேலும், வாக்காளா்கள் தங்களுக்கு வழங்கப்பட்ட கணக்கீட்டு படிவங்களை தவறு இல்லாமல் நிறைவுசெய்து வாக்குச்சாவடி நிலை அலுவலா்களிடம் வழங்குமாறும், சிறப்பு தீவிர திருத்தப் பணிக்கு அனைத்து வாக்காளா்களும் முழு ஒத்துழைப்பு வழங்க வேண்டும் என்றாா்.

ஆய்வின்போது துணை ஆட்சியா் அபிநயா, வட்டாட்சியா்கள் ரமேஷ், சின்னசாமி, தனி வட்டாசியா்கள் சக்திவேல், மகேஷ்வரி, ஜெய்சங்கா் உள்ளிட்டோா் உடனிருந்தனா்.

விபத்தில் சிக்கியவரை மீட்ட ஆட்சியா்: பா்கூா் சட்டப் பேரவைத் தொகுதியில் ஆய்விற்காக சென்றுவிட்டு கிருஷ்ணகிரி திரும்பும்போது, பிஆா்ஜி மாதேப்பள்ளி அருகே காா் மற்றும் இருசக்கர வாகனங்கள் மோதிக்கொண்ட விபத்தில் காயமடைந்த சின்னகார குப்பத்தை சோ்ந்த ராமசந்திரனுக்கு ஆட்சியா் ச.தினேஷ்குமாா் குடிநீா் வழங்கி ஆறுதல் கூறினாா். அதன்பிறகு 108 ஆம்புலன்ஸ் மூலம் கிருஷ்ணகிரி அரசு மருத்துவக் கல்லூரி மருத்துவமனைக்கு அவரை அனுப்பிவைத்தாா்.