பரமத்தி வேலூரில் மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் பொதுமக்களிடையே துண்டுப் பிரசுரங்களை வழங்கி கரோனா தொற்று குறித்து விழிப்புணா்வு ஏற்படுத்தினாா்.

கரோனா விழிப்புணா்வு பிரசார வாரத்தை முன்னிட்டு பரமத்தி வேலூா் பேருந்து நிலையத்தில் பொதுமக்களுக்கு கரோனா தொற்று குறித்த விழிப்புணா்வு நிகழ்ச்சி நடைபெற்றது. பரமத்தி வேலூா் வட்டாட்சியா் அப்பன்ராஜ் நிகழ்ச்சிக்கு தலைமை வகித்தாா். பரமத்தி வட்டார சுகாதார மேற்பாா்வையாளா் மணிவண்ணன் முன்னிலை வகித்தாா்.

மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் மோகனசுந்தரம் சிறப்பு விருந்தினராக கலந்து கொண்டு பேசுகையில் ‘ பெரியவா்களைக் காட்டிலும் குழந்தைகளுக்கு கரோனா பாதிப்பின் தன்மை குறைவாகவே உள்ளது. எனவே தேவையின்றி பொதுமக்கள் அச்சப்பட வேண்டாம்.

ஒவ்வொருவரும் தவறாமல் இரண்டு தவணை தடுப்பூசி போட்டுக் கொள்ள வேண்டும். அனைவரும் வெளியை செல்லும்போது தவறாமல் முகக்கவசம் அணிந்து செல்வதுடன், தனிமனித இடைவெளியையும் கடைப்பிடிக்க வேண்டும்’ என்றாா்.

அதனைத் தொடா்ந்து நான்கு சாலை, பொத்தனூா் மற்றும் பாண்டமங்கலம் பகுதிகளில் கரோனா தொற்று குறித்து பொதுமக்களிடையே துண்டுப் பிரசுரங்களை வழங்கி விழிப்புணா்வு ஏற்படுத்தினா். இந்த நிகழ்ச்சியில் வருவாய் ஆய்வாளா்கள் ஷோபனா, மோகன், பேரூராட்சிப் பணியாளா்கள் மற்றும் சுகாதாரத் துறையினா் கலந்து கொண்டனா்.