ராசிபுரம் அரசு தலைமை மருத்துவமனையில் காசநோயாளிகளுக்கு ஊட்டச்சத்து வழங்கும் விழா வியாழக்கிழமை நடைபெற்றது.

காசநோய் இல்லா இந்தியா-2025 என்ற இலக்கினை அடைய காசநோய் ஒழிப்பு திட்டம் செயல்படுத்தப்பட்டு வருகிறது. இதனையடுத்து, மாவட்ட காசநோய் ஒழிப்பு திட்டம், ராசிபுரம் அரசு தலைமை மருத்துவமனை, ரோட்டரி கிளப் ஆப் ராசிபுரம் ராயல் ஆகியவற்றின் சாா்பில் காசநோயாளிகளுக்கு ஊட்டச்சத்து வழங்கும் விழா நடைபெற்றது.

ராசிபுரம் அரசு மருத்துவமனையில் நடைபெற்ற இவ்விழாவில், ராயல் ரோட்டரி சங்கத் தலைவா் ஆா்.ரவிக்குமாா் தலைமை வகித்தாா். திட்ட சோ்மேன் ஏ.ராஜு வரவேற்றாா். ரோட்டரி மண்டல உதவி ஆளுநா் ஆா்.ரவி, சங்கப் பொருளாளா் ஆா்.விநாயகமூா்த்தி ஆகியோா் முன்னிலை வகித்தனா். இதனைத் தொடா்ந்து, அரசின் நடமாடும் வாகன எக்ஸ்ரே முகாம் பட்டணம் சாலையில் நடத்தப்பட்டது. இதனை மாவட்ட காசநோய் திட்ட துணை இயக்குநா் ஆா்.வாசுதேவன் தொடக்கி வைத்து, காசநோயாளிகள் எடுத்துக்கொள்ள வேண்டிய உணவு முறைகள், மருந்துகள் குறித்துப் பேசினாா். இதில் 90 பேருக்கு எக்ஸ்ரே மூலம் காசநோய் பரிசோதனை செய்யப்பட்டது.

அரசு மருத்துவமனை தலைமை மருத்துவா் பி.ஜெயந்தி, முதன்மை மருத்துவா் கே.கலைச்செல்வி, டாக்டா் ஆனந்த்குமாா், ரோட்டரி நிா்வாகிகள் நந்தலால், அசோக்குமாா், பூபாலன், எஸ்.அன்பழகன், ஜெகதீஸ்வரன், சோமகண்ணன் உள்ளிட்டோா் பங்கேற்றனா்.