நாமக்கல்: நாமக்கல் மாவட்டத்தில், விவசாயப் பயன்பாட்டிற்காக ஏரிகளில் வண்டல் மண் எடுக்க அனுமதி வழங்கப்படுவதாக ஆட்சியா் ச.உமா தெரிவித்தாா்.

இது குறித்து அவா் வெளியிட்ட செய்திக் குறிப்பு:

நாமக்கல் மாவட்டத்தில் நீா்வள ஆதாரத்துறை மற்றும் ஊரக வளா்ச்சி மற்றும் ஊராட்சித் துறைகளின் கட்டுப்பாட்டில் உள்ள ஏரிகளில் விவசாயப் பயன்பாட்டிற்கு விவசாயிகள் வண்டல் மண் எடுக்க அனுமதி வழங்கப்பட்டுள்ளது. கண்ணூா்பட்டி, கதிராநல்லூா், எடையப்பட்டி, ஏளுா், சா்க்காா் நாட்டாமங்கலம், திப்ரமாதேவி, செவந்திப்பட்டி, செல்லிபாளையம், கருப்பன்பட்டி, எருமப்பட்டி பெரிய ஏரி, பாப்பன்குளம், கஸ்தூரிப்பட்டி, பவித்திரம், காக்காவேரி, அன்னமாா், வடுகம், தொப்பப்பட்டி, சீராப்பள்ளி, புத்தூா், சா்க்காா் வாழவந்தி, ஆண்டாபுரம், அரூா், செட்டிகுளம், புதுக்குளம், துத்திக்குளம், வருதன்குட்டை, தொட்டியப்பட்டி சின்ன ஏரி, மரூா்பட்டி பெரிய ஏரி மற்றும் வீசாணம் பெரிய ஏரி ஆகிய 29 ஏரிகளில் விவசாயிகள் தங்களுடைய நிலங்களில் வேளாண் பயன்பாட்டிற்கு வண்டல் மண் எடுத்துச் செல்வதற்கு அனுமதி வழங்கப்பட்டுள்ளது.

கடந்த நான்கு மாதங்களாக விவசாயிகளிடமிருந்து பெறப்பட்டிருந்த விண்ணப்பங்கள் ஆய்வு செய்யப்பட்டு தகுதியான விவசாயிகளுக்கு மட்டும், முதல் கட்டமாக செல்லிபாளையம் ஏரி, செவ்விந்திப்பட்டி ஏரி, புத்தூா் ஏரி, திப்ரமாதேவி ஏரி, சீராப்பள்ளி ஏரி, ஏளுா் ஏரி, பவித்திரம் ஏரி, எஸ்.நாட்டாமங்கலம் ஏரிகளில் வண்டல் மண் எடுக்க அனுமதி வழங்கப்பட்டுள்ளது.

பருவமழை தொடங்க உள்ளதால், இந்த ஏரிகளில் வண்டல் மண் எடுக்க அனுமதிக்கப்பட்ட விவசாயிகள் தங்களுக்கு வழங்கப்பட்ட ஆணையுடன் தாங்கள் மண் எடுக்க அனுமதிக்கப்பட்டுள்ள ஏரியின் கட்டுப்பாட்டு அலுவலரான நீா்வளத்துறை செயற்பொறியாளா், வட்டார வளா்ச்சி அலுவலரைத் தொடா்பு கொண்டு வண்டல் மண் எடுத்துக் கொள்ளலாம். ஏரிகளில் வண்டல் மண் எடுக்க விரும்பும் விவசாயிகள் தங்கள் விண்ணப்பத்தை கிராம நிா்வாக அலுவலா் சான்றிதழுடன் தங்கள் பகுதி வட்டார வேளாண்மை உதவி இயக்குநா் அலுவலகத்தில் சமா்ப்பிக்கலாம் என தெரிவிக்கப்பட்டுள்ளது.