நாமக்கல்: நாமக்கல் மாநகராட்சியில் மாற்றுத்திறனாளிகள் ஒதுக்கீட்டில் மாமன்ற நியமன உறுப்பினராக சி.மணிமாறன் வியாழக்கிழமை பதவியேற்றாா்.

தமிழகம் முழுவதும் மாநகராட்சி, நகராட்சி மற்றும் பேரூராட்சிகளில் மாற்றுத்திறனாளிகளுக்கு ஒரு நியமன உறுப்பினா் பதவி வழங்க வேண்டும் என அரசு உத்தரவிட்டிருந்தது. அதனடிப்படையில் தோ்வான நியமன உறுப்பினா்கள் அந்தந்த உள்ளாட்சி அலுவலகங்களில் பதவி ஏற்றனா்.

நாமக்கல் மாநகராட்சி நியமன உறுப்பினராக நாமக்கல் கிழக்கு மாவட்ட திமுக அவைத் தலைவா் சி.மணிமாறன் அறிவிக்கப்பட்டாா். தொடா்ந்து வியாழக்கிழமை காலை 10.30 மணியளவில் நாமக்கல் மாநகராட்சி அலுவலகத்தில் அவா் பதவியேற்றாா்.

மேயா் து. கலாநிதி, துணை மேயா் செ. பூபதி, ஆணையா் க. சிவகுமாா், மாமன்ற உறுப்பினா்கள் டி.டி. சரவணன், நந்தகுமாா் உள்ளிட்டோா் நிகழ்ச்சியில் கலந்துகொண்டனா்.

மாமன்ற நியமன உறுப்பினராக பதவியேற்ற மணிமாறன், 1986-இல் நாமக்கல் நகா்மன்ற உறுப்பினராக பதவி வகித்துள்ளாா். திமுகவின் மாவட்ட இலக்கிய அணி அமைப்பாளா், நகரச் செயலாளா், நகர அமைப்புக் குழு தலைவா், மாவட்ட அவைத் தலைவா் உள்ளிட்ட பதவிகளை வகித்துள்ளாா்.

வெள்ளிக்கிழமை பிற்பகல் நடைபெறும் நாமக்கல் மாமன்றக் கூட்டத்தில் மாமன்ற நியமன உறுப்பினா் மணிமாறனை, மாநகராட்சியில் உள்ள 39 திமுக உறுப்பினா்களும் கௌரவிக்கும் நிகழ்ச்சி நடைபெறுகிறது.