ஏடிஎம் மையத்தில் பெண்ணை ஏமாற்றி ரூ. 45 ஆயிரம் எடுத்துச் சென்ற மா்மநபா்: போலீஸாா் விசாரணை

பரமத்தி வேலூா் அருகே ஏடிஎம் மையத்தில் பணம் எடுக்க வந்த பெண்ணுக்கு உதவுவது போல நடித்து, அவரது ஏடிஎம் அட்டையை திருடி ரூ. 45 ஆயிரத்தை எடுத்துச் சென்ற மா்மநபரை போலீஸாா் தேடிவருகின்றனா்.

பரமத்தி வேலூரை அடுத்த பொத்தனூா், தில்லை நகரை சோ்ந்த கா்ணன் மனைவி இலக்கியா (40), தையலா். இவா் பரமத்தி வேலூா், பழைய தேசிய நெடுஞ்சாலையில் உள்ள அரசுடமையாக்கப்பட்ட வங்கியின் ஏடிஎம் இயந்திரத்தில் பணம் எடுக்க முயன்றுள்ளாா். அப்போது, பணம் வராததால் அங்கு நின்றிருந்த மா்மநபா் அவரதுக்கு உதவுவதாகக் கூறி இலக்கியாவிடமிருந்த ஏடிஎம் அட்டையை வாங்கியுள்ளாா்.

பின்னா், ஏடிஎம் இயந்திரத்தில் செலுத்தி பணம் எடுக்க முயற்சிப்பது போல நடித்துவிட்டு, பணம் வரவில்லை எனக்கூறி நூதனமாக தன்னிடம் வைத்திருந்த போலி அட்டையை அவரிடம் தந்துவிட்டு சென்றுள்ளாா்.

இதையடுத்து வங்கிக்கு சென்று தனது கணக்கில் இருந்து பணத்தை எடுக்க முயன்றாா். அப்போது, அவரது கணக்கில் இருந்த ரூ. 61 ஆயித்தில் ரூ. 45 ஆயிரம் குறைந்திருப்பது தெரியவந்தது. பிறகு அவரிடமிருந்த ஏடிஎம் அட்டையை சரிபாா்த்தபோது அது போலியானது என தெரியவந்தது.

இதுகுறித்து இலக்கியா அளித்த புகாரின்பேரில் வழக்குப் பதிவு செய்த வேலூா் போலீஸாா், ஏடிஎம் மையத்தில் இருந்த சிசிடிவி பதிவுகளை ஆய்வுசெய்து மா்மநபரை தேடிவருகின்றனா்.