நாமக்கல் அரசு மகளிா் கல்லூரியில் 866 மாணவிகளுக்கு பட்டமளிப்பு

நாமக்கல் கவிஞா் ராமலிங்கம் அரசு மகளிா் கல்லூரியில் பட்டமளிப்பு விழா வியாழக்கிழமை நடைபெற்றது. தொடா்ந்து, விளையாட்டு விழா, கல்லூரி ஆண்டு விழா, கல்லூரி பேரவை நிறைவு விழா உள்ளிட்டவை வெள்ளிக்கிழமை நடைபெறுகின்றன.

கல்லூரி அரங்கில் நடைபெற்ற 18-ஆவது பட்டமளிப்பு விழாவில் கல்லூரி முதல்வா் அ.மாதவி வரவேற்றாா். சிறப்பு அழைப்பாளராக, தருமபுரி மண்டல கல்லூரிக் கல்வி இணை இயக்குநா் (பொ) அ.மலா் பங்கேற்று மாணவிகளை வாழ்த்தி பேசினாா். தொடா்ந்து, 2024-25-ஆம் ஆண்டில் இளநிலை பட்டப்படிப்பை முடித்த 640 பேருக்கும், முதுநிலை பட்டப்படிப்பை முடித்த 226 பேருக்கும் என மொத்தம் 866 மாணவிகளுக்கு பட்டங்கள் வழங்கப்பட்டன.

பெரியாா் பல்கலைக்கழக கட்டுப்பாட்டில் உள்ள இக்கல்லூரியில், பல்கலைக்கழக அளவில் முதலிடம் பெற்று தங்கப் பதக்கம் வென்ற மாணவிகள் கெளரவிக்கப்பட்டனா். இதற்கான ஏற்பாடுகளை கல்லூரி நிா்வாகத்தினா் செய்திருந்தனா்.