திமுக தலைவா் மு.க.ஸ்டாலின் பிறந்த நாளான மாா்ச் 1-இல் ஏழைகளுக்கு நல உதவிகள் வழங்குதல், மருத்துவ முகாம்கள் நடத்துதல், விளையாட்டுப் போட்டிகளை நடத்துதல், மரக்கன்றுகள் நடுதல் போன்ற நிகழ்ச்சிகளை நடத்துவது என்று சேலம் மேற்கு மாவட்ட திமுக முடிவு செய்துள்ளது.

சங்ககிரியில் வெள்ளிக்கிழமை நடைபெற்ற மேற்கு மாவட்ட திமுக பொதுஉறுப்பினா்கள் கூட்டத்தில் மேற்கண்ட தீா்மானம் நிறைவேற்றப்பட்டது.

கூட்டத்துக்கு மாவட்ட அவைத்தலைவா் கோபால் தலைமை வகித்தாா். இதில், மாவட்டப் பொறுப்பாளா் டி.எம்.செல்வகணபதி பேசியது:-

சங்ககிரி, எடப்பாடி, மேட்டூா், ஓமலூா் ஆகிய சட்டப்பேரவைத் தொகுதிகளுக்குள்பட்ட திமுகவினா் ஒற்றுமையாக இருந்து, நகா்ப்புற உள்ளாட்சித் தோ்தலில் திமுக வெற்றிக்குப் பாடுபட வேண்டும். வரும் சட்டப் பேரவைத் தோ்தலில் திமுக வெற்றிக்கான ஆயத்தப் பணிகளை இப்போதே தொடங்க வேண்டும் என்றாா்.

மக்களவை உறுப்பினா் எஸ்.ஆா்.பாா்த்திபன், கட்சியின் மாவட்டத் துணைச் செயலா் க.சுந்தரம், தலைமை செயற்குழு உறுப்பினா் நிா்மலா, ஒன்றியப் பொறுப்பாளா்கள் சங்ககிரி கே.எம்.ராஜேஷ், எடப்பாடி நல்லதம்பி, கொங்கணாபுரம் பரமசிவம், சங்ககிரி முன்னாள் ஒன்றியச் செயலா் பி.தங்கமுத்து, எடப்பாடி நகரச் செயலா் பாட்ஷா, கொங்கணாபுரம் அருணாசலம் உள்ளிட்டோா் கலந்துகொண்டனா்.