முதியோா் ஓய்வூதியம் பெறுபவா்களுக்கு மின்னணு குடும்ப அட்டை வழங்கல்

சேலம் மாவட்டத்தில் அரசு முதியோா் ஓய்வூதியம் பெறுபவா்களுக்கு நியாயவிலைக் கடைகளில் அரிசி, இதர சலுகைகளை வழங்கக் கோரி சேலம் மாவட்ட உபயோகிப்பாளா் உரிமைக் கழகத்தின் சாா்பில், மாவட்ட ஆட்சியருக்கு அண்மையில் கோரிக்கை மனு அனுப்பப்பட்டிருந்தது.

சேலம் மாவட்ட ஆட்சியருக்கு, சேலம் மாவட்ட உபயோகிப்பாளா் உரிமைக் கழகத்தின் மாவட்டத் தலைவா் சி.ஜி.இளமுருகன் அனுப்பியுள்ளகோரிக்கை மனுவில் கூறியுள்ளதாவது:

சேலம் மாவட்டம் முழுவதும் உள்ள வட்டங்களில் சமூக பாதுகாப்புத் திட்ட தனி வட்டாட்சியா் அலுவலகங்களில் முதியோா் ஓய்வூதியம் பெறும் நபா்களின் விபரங்களை வட்ட வழங்கல் அலுவலகங்கள் மூலமாக முழுமையாகச் சேகரித்து பட்டியல் பெற்று மாவட்ட முழுவதும் உள்ள நியாயவிலைக் கடைகளில் உள்ள மின்னணு சாதனங்களில் பதிவேற்றம் செய்து அவா்களுக்கு நியாயவிலைக் கடைகள் மூலம் அரிசி, இதர சலுகைகள் தொடா்ந்து கிடைக்க நடவடிக்கை எடுக்க வேண்டும் என அதில் கோரியுள்ளாா்.

அக் கடிதத்தைப் பரிசீலித்த மாவட்ட வழங்கல் மற்றும் நுகா்வோா் பாதுகாப்பு அலுவலா் முதியோா் உதவித்தொகை பெறுபவா்களுக்கு மின்னணு குடும்ப அட்டை வழங்க வேண்டும், குடும்ப உறுப்பினா்களின் மின்னணு குடும்ப அட்டையில் முதியோா் உதவித்தொகை பெறுபவா்கள் பெயா் சோ்க்க வேண்டும் என சேலம் மாவட்டத்தில் உள்ளஅனைத்து வட்ட வழங்கல் அலுவலா்களும் பின்பற்ற அறிவுறுத்தியுள்ளாா்.