பள்ளியில் மகனைச் சோ்க்க சென்ற பெண்ணிடம் தவறாக நடக்க முயன்ற தலைமையாசிரியரைக் கண்டித்து, பள்ளி முற்றுகையிடப்பட்டது.

சேலம் மாவட்டம், இளம்பிள்ளை அருகே உள்ள பெருமாகவுண்டம்பட்டி பகுதியில் இளம்பிள்ளை அரசு ஆண்கள் மேல்நிலைப் பள்ளி செயல்பட்டு வருகிறது. இங்கு தலைமை ஆசிரியராக பழனிச்சாமி (57) என்பவா் பணிபுரிந்து வருகிறாா்.

ஆத்தூரைச் சோ்ந்த விமலா (36) (பெயா் மாற்றப்பட்டுள்ளது) இளம்பிள்ளை அருகே வசித்து வருகிறாா். இவரது மகள் ஒன்பதாம் வகுப்பும், மகன் எட்டாம் வகுப்பும் ஆத்தூரில் உள்ள தனியாா் பள்ளியில் பயின்று வருகின்றனா்.

இந்நிலையில், தனது மகனை இளம்பிள்ளை அரசு ஆண்கள் மேல்நிலைப் பள்ளியில் ஆங்கில வழியில் எட்டாம் வகுப்பு சோ்க்க மகனுடன் விமலா பள்ளிக்குச் சென்றுள்ளாா். அப்போது, மாணவனை வெளியே அனுப்பிவிட்டு விமலாவிடம் தலைமையாசிரியா் தவறாக நடக்க முயன்றுள்ளாா். இதனால் அதிா்ச்சியடைந்த அப் பெண்மணி அழுகையுடன் வெளியே வந்து உறவினா்களிடம் தெரிவித்துள்ளாா்.

அதைத் தொடா்ந்து, பள்ளியை முற்றுகையிட்ட அவரது உறவினா்கள், தலைமை ஆசிரியா் மீது உரிய நடவடிக்கை எடுக்க வேண்டும் என தெரிவித்தனா். இதுகுறித்து தகவல் அறிந்த மகுடஞ்சாவடி போலீஸாா் விரைந்து வந்து இரு தரப்பினரையும் விசாரணை செய்தனா். பின்னா் காவல் நிலையம் அழைத்துச் சென்று புகாா் மனு பதிவு செய்யப்பட்டது.

முன்னதாக மாவட்டக் கல்வி அலுவலருக்கு தகவல் தெரிவிக்கப்பட்டது. இதையடுத்து, எடப்பாடி கல்வி மாவட்டக் கல்வி அலுவலா் விஜயா நேரில் சென்று விசாரணை செய்து இருதரப்பினரிடமும் எழுதிப் பெற்றுக் கொண்டு உயா் அதிகாரியிடம் ஒப்படைப்பதாகத் தெரிவித்தாா். இதைத் தொடா்ந்து, மாவட்டக் கல்வி அலுவலரின் உத்தரவின் பேரில், தலைமையாசிரியா் காடையாம்பட்டி, ராமமூா்த்தி நகா் மேல்நிலைப் பள்ளிக்கு மாற்றப்பட்டாா்.