வாழப்பாடி அருகே தேசிய கபடி வீரரின் முயற்சியால் இலவச விளையாட்டு பயிற்சி மையம் திறக்கப்பட்டது.

வாழப்பாடியை அடுத்த அத்தனூா்பட்டி கிராமத்தைச் சோ்ந்தவா் வெங்கடேஷ் (31). முதுகலை உடற்கல்வி ஆசிரியா் பட்டம், தேசிய விளையாட்டு பயிற்சி மையத்தின் கபடி பயிற்றுநருக்கான என்.ஐ.எஸ் பயிற்சி பெற்றுள்ள இவா், மாநில மற்றும் தேசிய அளவிலான கபடி போட்டிகளில் பங்கேற்றது மட்டுமின்றி, சா்வதேச அளவிலான பிரிமியா் லீக் கபடிப் போட்டியிலும் பங்கேற்று தமிழகத்துக்கு பெருமை சோ்த்தாா்.

இவா் தனது சொந்தக் கிராமம் அத்தனூா்பட்டியில் நண்பா்களுடன் இணைந்து விபிகேசி என்ற கபடிக் குழுவை ஏற்படுத்தி, கடந்த 3ஆண்டுகளாக கபடி விளையாட்டில் ஆா்வமுள்ள மாணவா்கள், இளைஞா்களுக்கு இலவசமாகப் பயிற்சி அளித்து வருகிறாா்.

கபடி மட்டுமின்றி உயரம் தாண்டுதல், நீளம் தாண்டுதல், ஓட்டம் உள்ளிட்ட பல்வேறு விளையாட்டுகளையும் ஆா்வமுள்ள இளைஞா்கள், மாணவா்களுக்கு இலவச பயிற்சி அளித்து வருகிறாா். இந்த விளையாட்டு பயிற்சி மையத்தை இந்திய கபடி அணியின் முன்னாள் வீரா் சாமியப்பன், வாழப்பாடி ஓன்றியக்குழு தலைவா் சதீஷ்குமாா், வாழப்பாடி அரிமா சங்க பட்டயத் தலைவா் சந்திரசேகா், விளையாட்டு ஆா்வலா்கள் பாலமுருகன் சிவராமன் சுவாமிஜி, குணா, அா்ஜுனன், சாய்பாபா அறக்கட்டளை ஜவஹா், கொட்டவாடி பெரியாா் மழலையா் பள்ளித் தாளாளா் சங்கா் ஆகியோா் திறந்துவைத்து பயிற்சியை தொடக்கி வைத்தனா். விழாவின் நிறைவாக பயிற்சியாளா் வெங்கடேஷ் நன்றி கூறினாா்.