மத்திய அரசைக் கண்டித்து செப்.20-இல் வீடுகள் முன்பு கருப்புக் கொடியேற்றி போராட்டம்: டி.எம்.செல்வகணபதி

மத்திய அரசை கண்டித்து செப்.20இல் வீடுகளின் முன்பு கருப்புக் கொடியேற்றி போராட்டத்தில் ஈடுபட வேண்டும் என திமுக மேற்கு மாவட்ட பொறுப்பாளா் டி.எம்.செல்வகணபதி தெரிவித்துள்ளாா்.

இதுதொடா்பாக அவா் வெளியிட்டுள்ள அறிக்கையில் கூறியிருப்பதாவது:

மத்திய அரசு கொண்டுவந்த 3 புதிய வேளாண் சட்டங்களை ரத்து செய்ய மறுப்பது, டீசல், சமையல் எரிவாயு விலை உயா்வு தொடா்வது, பொருளாதாரச் சீரழிவு, தனியாா்மயமாக்குதல், வேலையில்லாத் திண்டாட்டம், பொதுத்துறை நிறுவனங்களை விற்பது, பெகாசஸ் ஒட்டுகேட்பு உள்ளிட்ட மத்திய அரசின் மக்கள் விரோத நடவடிக்கையைக் கண்டித்து தமிழக முதல்வா் மு.க.ஸ்டாலின் உத்தரவிற்கு இணங்க சேலம் மேற்கு மாவட்ட திமுக சாா்பில் செப்.20 ஆம் தேதி காலை 10 மணி அளவில் தங்கள் வீடுகளின் முன்பு கருப்புக் கொடியேற்றி போராட்டத்தில் ஈடுபட வேண்டும்.

இதில் கட்சியின் மாவட்ட நிா்வாகிகள், தலைமைச் செயற்குழு உறுப்பினா்கள், ஒன்றிய, நகர, பேரூா், வாா்டு ஊராட்சி கிளை செயலாளா்கள் உள்ளிட்ட நிா்வாகிகள்,துணை அமைப்புகளான இளைஞரணி, மாணவரணி, மகளிரணி, தொண்டரணி, விவசாய அணி, விவசாய தொழிலாளரணி, வழக்குரைஞா் அணி, நெசவாளா் அணி, ஆதிதிராவிடா் நலக்குழு உரிமைப் பிரிவு, தகவல் தொழில்நுட்பப் பிரிவு மற்றும் அனைத்து கூட்டணிக் கட்சி நிா்வாகிகள் அவரவரா் பகுதியில் பொதுமக்களும் பங்கேற்கும் வகையில் ஏற்பாடுகளை செய்ய வேண்டும். இந்தப் போராட்டம் மாபெரும் வெற்றி பெறும் வகையில் களப்பணியாற்ற வேண்டும் எனத் தெரிவித்துள்ளாா்.