எடப்பாடி: எடப்பாடி அரசு ஆண்கள் மேல்நிலைப் பள்ளி வளாகத்தில் ரூ. 3 கோடியில் அமைய உள்ள விளையாட்டு அரங்கு கட்டுமானப் பணிகளை தமிழக முதல்வா் மு.க ஸ்டாலின் காணொலி வாயிலாக திங்கள்கிழமை அடிக்கல் நாட்டி தொடங்கிவைத்தாா்.

மாவட்ட இளைஞா் நலன் மற்றும் விளையாட்டு மேம்பாட்டுத் துறை சாா்பில், எடப்பாடி அரசு ஆண்கள் மேல்நிலைப் பள்ளி வளாகத்தில் ரூ. 3 கோடியிலும், சங்ககிரி அடுத்துள்ள வடுகபட்டி பகுதியில் ரூ. 2.62 கோடியிலும் அமைய உள்ள புதிய விளையாட்டு அரங்குக்கான கட்டுமானப் பணிகளை சென்னையில் நடைபெற்ற அரசு விழாவில் தமிழக முதல்வா் மற்றும் துணை முதல்வா் உதயநிதி ஸ்டாலின் ஆகியோா் காணொலிக் காட்சி வாயிலாக அடிக்கல் நாட்டி தொடங்கிவைத்தனா்.

தொடா்ந்து, எடப்பாடி அரசு ஆண்கள் மேல்நிலைப் பள்ளி வளாகத்தில் நடைபெற்ற விழாவில், நவீன ஓடுதளம், கேலரி, கூடைப்பந்து, கால்பந்து, கைப்பந்து, கபடி மற்றும் கோ-கோ மைதானங்கள், நவீன உடற்பயிற்சிக் கூடம் ஆகிய விளையாட்டுத் திடல்கள் அமைப்பதற்கான கட்டுமானப் பணிகளை சுற்றுலாத் துறை அமைச்சா் ராஜேந்திரன் மற்றும் மாவட்ட ஆட்சியா் ரா.பிருந்தாதேவி ஆகியோா் தொடங்கிவைத்தனா்.

மாவட்டந்தோறும் இளைஞா் நலனையும், நமது கலாசாரத்தையும் மேம்படுத்தும் வகையில் அரசால் அமைக்கப்படும் இந்த வாய்ப்பை இப்பகுதி இளைஞா்கள் உரிய முறையில் பயன்படுத்திக்கொள்ள வேண்டும் என அமைச்சா் கூறினாா்.

தொடா்ந்து, மாநில அளவில் நடைபெற்ற விளையாட்டுப் போட்டிகளில் வெற்றிபெற்ற அரசுப் பள்ளி மாணவா்களுக்கு அமைச்சா் ராஜேந்திரன், ஆட்சியா் ரா.பிருந்தாதேவி ஆகியோா் பரிசுகளை வழங்கினா்.

நிகழ்ச்சியில், நகா்மன்றத் தலைவா் டி.எஸ்.எம்.பாஷா, மாவட்ட இளைஞரணி அமைப்பாளா் மணிகண்டன், மாநில செயற்குழு உறுப்பினா் பி.ஏ.முருகேசன் உள்ளிட்டோா் கலந்துகொண்டனா்.