சேலம் மாநகராட்சிப் பகுதியில் ரூ. 1.79 கோடியில் வளா்ச்சித் திட்டப் பணிகளை சுற்றுலாத் துறை அமைச்சா் ரா.ராஜேந்திரன் புதன்கிழமை தொடங்கிவைத்தாா்.

பின்னா் அமைச்சா் தெரிவித்ததாவது:

சேலம் வடக்கு பேரவை உறுப்பினா் தொகுதி மேம்பாட்டு நிதியில் ரூ. 18 லட்சத்தில் கட்டப்பட்டுள்ள அரசு மகளிா் கலைக் கல்லூரி அருகில் பயணிகள் நிழற்கூடம்,

கோட்டம் எண். 7 எழில்நகா் 2 ஆவது குறுக்குத் தெருவில் ரூ. 24 லட்சத்தில் அமைக்கப்பட்டுள்ள சுற்றுச்சுவா் மற்றும் நடை பாதை, கோட்டம் எண்.14 அஸ்தம்பட்டி, இட்டேரி சாலை பகுதியில் ரூ.15 லட்சத்தில் கட்டப்பட்டுள்ள நியாய விலைக்கடை கட்டடமும் திறந்து வைக்கப்பட்டன.

தொடா்ந்து, கோட்டம் எண்.15 இல் ரூ. 15 லட்சத்தில் கட்டப்பட்ட நியாயவிலைக் கடை கட்டடம், கோட்டம் எண்.14 தொங்கும் பூங்கா வளாகத்தின் பின்புறம் ரூ.17 லட்சத்தில் கட்டப்பட்டுள்ள நியாயவிலைக்கடை கட்டடம், கோட்டம் எண். 31 அருணாசலம் தெரு மாநகராட்சி தொடக்கப் பள்ளியில் ரூ. 40 லட்சத்தில் இரண்டு வகுப்பறை கட்டடங்கள், கோட்டம் எண்.28 வண்டிப்பேட்டை அருகில் ரூ. 15 லட்சத்தில் கட்டப்பட்டுள்ள நியாயவிலைக்கடை கட்டடம் என ரூ. 1.44 கோடி மதிப்பீட்டிலான வளா்ச்சித் திட்டப் பணிகள் தொடங்கிவைக்கப்பட்டன.

கோட்டம் எண்.8 பாரதி நகா் மாரியம்மன் கோயில் வடக்கு மற்றும் தெற்கு பகுதிகளில் ரூ. 35 லட்சத்தில் கழிவுநீா் வாய்க்கால் அமைக்கும் பணி தொடங்கிவைக்கப்பட்டது. இதன்மூலம் மாநகராட்சி பகுதியில் ரூ. 1.79 கோடியில் வளா்ச்சித் திட்டப்பணிகள் தொடங்கிவைக்கப்பட்டுள்ளன என்றாா்.

இந்நிகழ்வுகளின்போது மாவட்ட வருவாய் அலுவலா் ரா.ரவிக்குமாா், துணை மேயா் மா.சாரதாதேவி, பொதுப்பணித் துறை செயற்பொறியாளா் தியாகராஜன், அஸ்தம்பட்டி மண்டலக் குழுத் தலைவா் செ.உமாராணி, துணை பதிவாளா்கள் மு.ப.பாலாஜி, அ.சரவணன் உள்ளிட்ட அலுவலா்கள் கலந்துகொண்டனா்.