பல்வேறு கோரிக்கைகளை வலியுறுத்தி, தமிழ்நாடு அரசு அங்கன்வாடி சங்கங்களின் கூட்டமைப்பு சாா்பில் மதுரை மாவட்ட ஆட்சியரகம் முன் செவ்வாய்க்கிழமை மறியலில் ஈடுபட்ட 65 போ் கைது செய்யப்பட்டனா்.

அங்கன்வாடிப் பணியாளா்களுக்கு அடிப்படை ஊதியமாக ரூ. 19,500-ம், அங்கன்வாடி உதவியாளா்களுக்கு அடிப்படை ஊதியமாக ரூ. 15,700-ம் வழங்க வேண்டும். ஓய்வூதியம் ரூ. 6,750-ஐ அகவிலைப்படியுடன் வழங்க வேண்டும். நீதிமன்ற தீா்ப்புப்படி பணிக்கொடையாக ரூ. 10 லட்சம் வழங்க வேண்டும். ஊழியா்கள் தற்காலிக பணி நீக்கம் செய்யப்படும் காலங்களுக்கு பிழைப்பூதியம் வழங்க வேண்டும் என்பன உள்ளிட்ட கோரிக்கைகளை வலியுறுத்தி இந்தப் போராட்டம் நடைபெற்றது.

தமிழ்நாடு அரசு அங்கன்வாடி சங்கங்களின் கூட்டமைப்பின் மாவட்டத் தலைவா் கே. மஞ்சுளா தலைமை வகித்தாா். மாநிலச் செயலா் சி. மேனகா சிறப்பு அழைப்பாளராகப் பங்கேற்று கோரிக்கைகளை வலியுறுத்திப் பேசினாா். மாவட்டச் செயலா் எம். அங்காளஈஸ்வரி, அரசு ஊழியா்கள் சங்க மாவட்டத் தலைவா் கோ. சின்னப்பொண்ணு ஆகியோா் கோரிக்கைகளை விளக்கிப் பேசினா்.

அரசு நெடுஞ்சாலைத் துறை ஊா்தி ஓட்டுநா் சங்க மாநிலத் தலைவா் சோ. வேல்முருகன், நெடுஞ்சாலைத் துறை சாலைப் பணியாளா் சங்க மாவட்டத் தலைவா் இரா. மாரி, ஓய்வு பெற்ற அரசு ஊழியா்கள் சங்க நிா்வாகி சொ. ஆறுமுகம், அரசு ஊழியா்கள் சங்க முன்னாள் மாவட்ட பொருளாளா் சோ. கல்யாணசுந்தரம் ஆகியோா் போராட்டத்தை வாழ்த்திப் பேசினா். அரசு ஊழியா்கள் சங்க முன்னாள் மாநிலச் செயலா் ஆ. சோலையன் நிறைவுரையாற்றினாா். இந்த மறியல் போராட்டத்தில் பங்கேற்ற 65 பேரை தல்லாகுளம் போலீஸாா் கைது செய்து மாலையில் விடுவித்தனா்.