'மக்களிடம் கொள்ளையடித்த பணத்தை தோ்தல் நேரத்தில் வழங்குவது வாடிக்கையாகிவிட்டது'

மக்களிடம் கொள்ளையடித்த பணத்தை தோ்தல் நேரத்தில் வழங்குவது என்பது வாடிக்கையாகிவிட்டது என தமிழக பாஜக துணைத் தலைவா் கே.அண்ணாமலை தெரிவித்தாா்.

மத்திய அரசின் வேளாண் திருத்தச் சட்டங்கள் குறித்து விவசாயிகளிடம் விழிப்புணா்வு ஏற்படுத்தும் கருத்தரங்கம் மற்றும் கலந்துரையாடல் கூட்டம் பாஜக சாா்பில் திங்கள்கிழமை நடைபெற்றது. 7 மண்டலங்களில் நடைபெற்ற இந்த நிகழ்ச்சியில் சிறப்பு அழைப்பாளராக தமிழக பாஜக துணைத் தலைவா் கே.அண்ணாமலை கலந்து கொண்டாா்.

திண்டுக்கல் நகரில் நடைபெற்ற கலந்துரையாடல் கூட்டத்துக்கு முன்னதாக செய்தியாளா்களிடம் அவா்

கூறியது: தமிழகத்தில் கடந்த 2016 ஆம் ஆண்டு முதலே அதிமுக அரசு ஒப்பந்த முறை விவசாயத்தை அமலுக்கு கொண்டு வந்துவிட்டது. கடந்த 4 ஆண்டுகளாக அச்சட்டத்தை எதிா்க்காத திமுக இன்று அரசியல் காரணங்களுக்காக எதிா்த்து வருகிறது.

2019 மக்களவைத் தோ்தலின்போது காங்கிரஸ் கட்சியின் தோ்தல் அறிக்கையில் இடைத்தரகா்களின் தலையீடு இல்லாமல் விளைப் பொருள்களை விவசாயிகள் விற்பனை செய்வதற்கு நடவடிக்கை எடுக்கப்படும் என தெரிவிக்கப்பட்டிருந்தது. அதனை தற்போது ஆட்சிப் பொறுப்பிலுள்ள பாஜக சட்டத் திருத்தத்தின் மூலம் அமல்படுத்த முயற்சித்தது. 2 மாதங்களாக இந்த சட்டத் திருத்தத்திற்கு எதிராக பஞ்சாப் விவசாயிகள் போராடி வரும் நிலையில், அந்த சட்டங்களுக்கு திமுக ஏன் எதிா்ப்பு தெரிவிக்கவில்லை?

தமிழக முதல்வா் எடப்பாடி கே.பழனிசாமியை பாஜக விமா்சிக்கவில்லை. சட்டப்பேரவைத் தோ்தலுக்கான கூட்டணியை பாஜக தலைமையே முடிவு செய்யும். அதே நேரத்தில் தமிழக அரசியல் கெட்டுப் போய்விட்டது என்ற கருத்தில் உறுதியாக உள்ளோம். அனைத்து துறைகளிலும் ஊழல் மலிந்துவிட்டது. மக்களிடம் கொள்ளையடித்த பணத்தை தோ்தல் நேரத்தில் மீண்டும் மக்களுக்கு கொடுப்பது வாடிக்கையாகிவிட்டது.

தமிழ்நாடு எப்போதுமே முன்னோடி மாநிலமாகத் தான் இருந்துள்ளது. திராவிடக் கட்சிகளின் பிடியில் சிக்காமல் இருந்திருந்தால், தமிழகத்தின் வளா்ச்சி வேறு மாதிரியாக இருந்திருக்கும். இளைஞா்கள் நிறைந்த கட்சியாக உள்ள பாஜக, தமிழகத்தில் மாற்று அரசியலை உருவாக்கும். கட்சி தலைமை கட்டளையிட்டால் தோ்தலில் போட்டியிடுவேன் என்றாா்.

அப்போது பாஜக வின் திண்டுக்கல் கிழக்கு மாவட்டத் தலைவா் தனபாலன் உடனிருந்தாா்.