அனுமந்தராயன்கோட்டை அருகே தடுப்பணையில் குளிக்கச் சென்ற சிறுவன் நீரில் மூழ்கி உயிரிழந்தது குறித்து போலீஸாா் புதன்கிழமை வழக்குப்பதிந்து விசாரிக்கின்றனா்.

திண்டுக்கல் அடுத்துள்ள பித்தளைப்பட்டி பகுதியைச் சோ்ந்தவா் அங்கப்பன். இவரது மகன் பூபதிராஜா(13). அதே பகுதியிலுள்ள பள்ளியில் 8ஆம் வகுப்பு படித்து வந்தாா். இந்நிலையில், அனுமந்தராயன்கோட்டையை அடுத்து சூசைப்பட்டி பகுதியில் உள்ள கொடகனாற்று தடுப்பணையில் குளிப்பதற்காக தனது நண்பா்களுடன் செவ்வாய்க்கிழமை மாலை சென்றாா். அப்போது நீரில் மூழ்கி பூபதிராஜா மாயமானாா். இதனை அடுத்து ஆத்தூா் தீயணைப்பு நிலையத்துக்கு தகவல் தெரிவிக்கப்பட்டு சிறுவனை தேடும் பணி நடைபெற்றது. தீவிர தேடுதல் முயற்சிக்குப் பின் பூபதிராஜா சடலமாக மீட்கப்பட்டாா்.

இதுகுறித்து திண்டுக்கல் தாலுகா போலீஸாா் வழக்குப் பதிந்து விசாரிக்கின்றனா்.