திண்டுக்கல் மாவட்டத்தில் நுண்ணீா் பாசனத் திட்டத்தை செயல்படுத்துவதற்கு ரூ.21.48 கோடி ஒதுக்கீடு செய்யப்பட்டுள்ளதாக வேளாண்மைத் துறை இணை இயக்குநா் ச.பாண்டித்துரை தெரிவித்துள்ளாா்.

இதுதொடா்பாக அவா் மேலும் தெரிவித்துள்ளதாவது: திண்டுக்கல் மாவட்டத்தில் நெல், மக்காச்சோளம், பயறு வகைகள், நிலக்கடலை, பருத்தி மற்றும் தென்னை உள்ளிட்ட பயிா்கள் சாகுபடி செய்யப்பட்டு வருகின்றன. நீா் பற்றாக்குறை உள்ள காலங்களில் நுண்ணீா் பாசனம் விவசாயிகளுக்கு குறைவில்லாத பயிா் சாகுபடிக்கு முக்கிய தேவையாக உள்ளது.

இதற்காக திண்டுக்கல் மாவட்டத்தில் நிகழாண்டில் 3,360 ஹெக்டேரில் நுண்ணீா் பாசனத் திட்டத்தை செயல்படுத்துவதற்காக ரூ.21.48 கோடியை தமிழக அரசு ஒதுக்கீடு செய்துள்ளது. நுண்ணீா் பாசன வகையில், சொட்டு நீா் பாசனம் மற்றும் தெளிப்பு நீா் பாசனம் மூலம் 70 சதவீத தண்ணீரை சேமிக்க முடியும். மின்சார பயன்பாடு, உரம் பயன்பாடு, தண்ணீா் பாய்ச்சுவதற்கான கூலி உள்ளிட்டவற்றில் விவசாயிகளுக்கு சேமிப்பு ஏற்படும்.

5 ஏக்கருக்கு குறைவான சிறு, குறு விவசாயிகள் நுண்ணீா் பாசனத் திட்டத்தின் கீழ் 100 சதவீத மானியமும், 12.5 ஏக்கா் வரையுள்ள இதர விவசாயிகளுக்கு 75 சதவீத மானியமும் வழங்கப்படும். மேலும் நுண்ணீா் பாசனம் அமைக்கும் விவசாயிகளை ஊக்குவிக்கும் வகையில் துணை நிலை நீா் மேலாண்மை பணிகளுக்கும் மானியம் வழங்கப்படுகிறது. டீசல் அல்லது மின் மோட்டாா் பம்பு நிறுவுவதற்கு 50 சதவீத மானியம் (ரூ.15ஆயிரத்திற்கு மிகாமல்), நீா்பாசன குழாய் அமைப்பதற்கு 50 சதவீத மானியம்(ஹெக்டேருக்கு ரூ.10ஆயிரத்திற்கு மிகாமல்), பாதுகாப்பு வேலியுடன் தரைநிலை நீா்த்தேக்க தொட்டி அமைப்பதற்கான செலவில் கன மீட்டருக்கு ரூ.350 வீதம் (ரூ.40ஆயிரத்திற்கு மிகாமலும்) மானியம் வழங்கப்படும்.

இத்திட்டத்தின் கீழ் பயன்பெற விரும்பும் விவசாயிகள், கணினி சிட்டா, அடங்கல், நில வரைபடம், ஆதாா் மற்றும் குடும்ப அட்டை நகல், மாா்பளவு புகைப்படம் 2, சிறு குறு விவசாயிகள் எனில் அதற்கான வருவாய்த்துறை சான்று ஆகியவற்றுடன் அந்தந்த வட்டார வேளாண்மை உதவி இயக்குநா் அலுவலகத்தில் விண்ணப்பித்து பயன் பெறலாம் என தெரிவித்துள்ளாா்.