பேரூராட்சி உறுப்பினா்கள் உள்ளிருப்புப் போராட்டம்

நெய்க்காரபட்டியில் வாா்டு பிரச்னைகளை சீரமைக்காத பேரூராட்சித் தலைவரைக் கண்டித்து, உறுப்பினா்கள் புதன்கிழமை உள்ளிருப்புப் போராட்டத்தில் ஈடுபட்டனா்.

பழனி அருகேயுள்ள நெய்க்காரபட்டி பேரூராட்சியில் 15 வாா்டுகள் உள்ளன. அனைத்து வாா்டுகளிலும் திமுக உறுப்பினா்களே வெற்றி பெற்றனா். இதையடுத்து, தலைவராக திமுகவைச் சோ்ந்த கருப்பாத்தாள் தோ்வு செய்யப்பட்டாா்.

இந்த நிலையில், பேருராட்சி உறுப்பினா்களின் கோரிக்கைகளை தலைவா் கண்டு கொள்வதில்லை எனக் கூறி, புதன்கிழமை பேரூராட்சி அலுவலகத்தில் உறுப்பினா்கள் உள்ளிருப்புப் போராட்டத்தில் ஈடுபட்டனா். துணைத் தலைவி சகுந்தலாமணி தலைமையில் நடைபெற்ற இந்த உள்ளிருப்புப் போராட்டத்தில் பங்கேற்ற உறுப்பினா்கள் கூறியதாவது: பேரூராட்சியில் கால்வாய், குடிநீா், சாலை வசதி உள்ளிட்ட எந்தப் பணிகளும் சரிவர நடக்கவில்லை. இதுகுறித்து தலைவருக்கு பலமுறை தெரிவித்தும், அவா் தன்னிச்சையாகச் செயல்படுகிறாா்.

பேரூராட்சி செயல் அலுவலரிடம் புகாா் செய்தாலும், அவரையும் வேலை செய்யவிடாமல் தலைவா் தடுக்கிறாா். இதனால், வாா்டுகளில் எங்களுக்கு அவப்பெயா் ஏற்படுகிறது. இதனால், நாங்கள் ராஜினாமா கடிதத்துடன் வந்துள்ளோம் என்றனா். இதையடுத்து, துணைத் தலைவா், உறுப்பினா்களிடம் பேரூராட்சி செயல் அலுவலா் பாண்டீஸ்வரி பேச்சுவாா்த்தை நடத்தி, பணிகள் நடைபெற ஏற்பாடு செய்வதாக உறுதியளித்தாா். இதைத் தொடா்ந்து உள்ளிருப்பு போராட்டம் அவா்கல் கைவிட்டனா்.