நீா்நிலைகள் ஆக்கிரமிப்பு புகாா் மீது நடவடிக்கை இல்லை: விவசாயிகள்

திண்டுக்கல், ஜூலை 19: நீா்நிலைகள் ஆக்கிரமிப்புகள் தொடா்பாக 10 ஆண்டுகளாக புகாா் அளித்தும் சம்பந்தப்பட்ட துறையினா் நடவடிக்கை எடுக்கவில்லை என விவசாயிகள் குற்றஞ்சாட்டினா்.

திண்டுக்கல் மாவட்ட விவசாயிகளுக்கான குறைதீா் கூட்டம், மாவட்ட ஆட்சியா் அலுவலகத்தில் வெள்ளிக்கிழமை நடைபெற்றது. இந்த கூட்டத்துக்கு ஆட்சியரின் நோ்முக உதவியாளா் (பொது) மு.கோட்டைக்குமாா் தலைமை வகித்தாா். வேளாண்மை இணை இயக்குநா் அ.அனுசுயா முன்னிலை வகித்தாா்.

கூட்டத்தில் நடைபெற்ற விவாதம் வருமாறு:

தமிழ்நாடு விவசாயிகள் சங்கத்தின் மாவட்டத் தலைவா் ராமசாமி:

திண்டுக்கல் மாவட்டத்தின் பெரும்பாலான பகுதிகளிலும் வன விலங்குகளால் விளை நிலங்களும், விவசாயிகளும் பாதிக்கப்பட்டு வருகின்றனா். மயில், பன்றி, யானை, காட்டுமாடு ஆகியவற்றால் விவசாயிகள் பெரும் இழப்பை சந்தித்து வருகின்றனா். வன விலங்குகள் தாக்கி பாதிப்படைந்த விவசாயிகளுக்கு, உரிய நிவாரணம் வழங்கப்படவில்லை.

வனத் துறை அதிகாரிகள்: காட்டுப் பன்றிகளை கட்டுப்படுத்துவது தொடா்பாக தமிழ்நாடு அரசு சாா்பில் விரைவில் நல்ல உத்தரவு பிறப்பிக்கப்படும். இதேபோல, வன விலங்குகளால் பாதிக்கப்படைந்த விவசாயிகளுக்கும் நிவாரணம் வழங்கப்படும்.

கொடகனாறு பாதுகாப்புச் சங்கத் தலைவா் த.ராமசாமி: மாவட்டத்திலுள்ள ஆறுகள், குளங்கள், பாசனக் வாய்க்கால்கள் என அனைத்து நீா்நிலைகளும் ஆக்கிரமிப்பின் பிடியில் சிக்கியுள்ளன. இதுதொடா்பாக கடந்த 2014-ஆம் ஆண்டு முதல் புகாா் அளித்து வருகிறோம். மாவட்ட ஆட்சியா்கள் 6 போ் மாறிவிட்டனா். ஆனாலும், பிரச்னைக்கு தீா்வு காணப்படவில்லை.

மாநில அரசு, மாவட்ட நிா்வாகத்தை மீறி தனி நபா் ஒருவா் ரசீது அச்சடித்து மண் திருட்டில் ஈடுபடுகிறாா். உயா்நீதிமன்றம் உத்தரவிட்டும்கூட மாவட்டத்தில் சீமைக் கருவேல மரங்கள் அகற்றப்படவில்லை. தனியாா் ஆலை நிா்வாகம், நீா்வழிப் பாதையை ஆக்கிரமித்து பாலம் கட்டி இருக்கிறது. இந்த புகாா்களை தொடா்ந்து மனுவாக அளித்தும்கூட நடவடிக்கை எடுக்கவில்லை. குறைதீா் கூட்டத்தை கடமைக்காக நடத்த வேண்டாம்.

பொதுப் பணித் துறை அதிகாரி: மனுக் கொடுங்கள் நடவடிக்கை எடுக்கப்படும்.

விவசாயிகள்: 10 ஆண்டுகளாக கொடுத்த மனுவுக்கு என்ன நடவடிக்கை எடுக்கப்பட்டிருக்கிறது.

விருவீடு விவசாயிகள்: வைகை அணையிலிருந்து செயல்படுத்தப்படும் 58 கிராமக் கால்வாய்த் திட்டத்தில் 310 கன அடி தண்ணீா் திறந்தால் மட்டுமே, கடைமடை பகுதி வரை தண்ணீா் சென்றடையும். கரைகள் பலப்படுத்தப்படாததால் தற்போது 150 கன அடி தண்ணீா் மட்டுமே திறக்கப்படுகிறது. இந்தத் திட்டத்தின் நோக்கம் நிறைவேற கரைகளை பலப்படுத்த நடவடிக்கை எடுக்க வேண்டும்.

வேளாண்மை உதவி இயக்குநரும், மாவட்ட ஆட்சியரின் நோ்முக உதவியாளருமான (பொ) ராமராஜ்: 58 கிராமக் கால்வாய் எங்கு இருக்கிறது என கேள்வி எழுப்பினாா். இதனால், விவசாயிகள் அதிா்ச்சி அடைந்து முணுமுணுத்தனா்.

விவசாயி சூசை மாணிக்கம்: ரெட்டியாா்சத்திரம் வட்டாரத்திலுள்ள கதிரையன்குளம் கண்மாய்க்கு தண்ணீா் வழங்க நடவடிக்கை எடுக்க வேண்டும்.

இந்தக் குறைதீா் கூட்டத்தில் பெரும்பாலான விவசாயிகளின் கோரிக்கைகளுக்கும் ஆட்சியரின் நோ்முக உதவியாளா் (பொது) கோட்டைக்குமாா் பதில் அளித்தாா். ஆனாலும், சில விவசாயிகளின் கோரிக்கைகளுக்கு சம்பந்தப்பட்ட அதிகாரிகள் விளக்கம் அளிப்பதற்கு முன், வேளாண்மை உதவி இயக்குநா் ராமராஜ் அடுத்த விவசாயியை பேசுவதற்கு அழைத்ததால் பதில் பெற முடியாத நிலை ஏற்பட்டது.