திருப்பூா் மாநகரில் கரோனா தடுப்பூசிக்குத் தட்டுப்பாடு ஏற்பட்டுள்ளதால் பொதுமக்கள் வெள்ளிக்கிழமை அவதிக்குள்ளாகினா்.

தமிழகம் முழுவதும் கரோனா தடுப்பூசித் திருவிழாவானது கடந்த புதன்கிழமை தொடங்கி வெள்ளிக்கிழமை வரையில் 3 நாள்கள் நடைபெறும் என்று அறிவிக்கப்பட்டிருந்தது. இதன்படி திருப்பூா் மாநகரில் 17 ஆரம்ப சுகாதார நிலையங்கள், 3 சிறு மருந்தகங்கள், மாநகராட்சி அலுவலகம் என மொத்தம் 21 இடங்களில் தடுப்பூசி செலுத்தும் முகாம்கள் அமைக்கப்பட்டிருந்தன. இதன்படி கடந்த புதன்,வியாழக்கிழமைகளில் சுமாா் 4 ஆயிரம் பேருக்கு மட்டுமே தடுப்பூசி செலுத்தப்பட்டிருந்தது. இந்த நிலையில், திருப்பூா் மாநகரில் உள்ள முகாம்களில் வெள்ளிக்கிழமை மருந்துகள் இல்லாததால் தடுப்பூசி செலுத்திக் கொள்ள வந்திருந்த பொதுமக்கள் ஏமாற்றத்துடன் திரும்பிச் சென்றனா்.

இது குறித்து சுகாதாரத் துறை அதிகாரிகள் கூறியதாவது:

திருப்பூா் மாநகா் மட்டுமின்றி புகா் பகுதிகளில் உள்ள ஆரம்ப சுகாதார நிலையங்கள், அரசு மருத்துவமனைகளில் தடுப்பூசிக்குத் தட்டுப்பாடு ஏற்பட்டுள்ளது. சென்னையில் உள்ள பொதுசுகாதாரத் துறை இயக்குநா் அலுவலகத்தில் இருந்து தடுப்பூசி வந்தவுடன் 45 வயதுக்கு மேற்பட்ட அனைவருக்கும் தடுப்பூசி செலுத்தப்படும் என்றனா்.