காந்தி நினைவு அருங்காட்சியகத்தில் ஸ்பெயின் நாட்டு கல்வியாளா்கள் பங்கேற்ற காந்தியச் சிந்தனை கருத்தரங்கு வெள்ளிக்கிழமை நடைபெற்றது.

நாட்டின் 75ஆவது சுதந்திர தின அமுதப் பெருவிழாவை முன்னிட்டு, ‘இந்திய- ஸ்பெயின் உலகளாவிய பாா்வையில் காந்தியச் சிந்தனை’ எனும் தலைப்பில், கலந்துரையாடல் நடைபெற்றது. காந்தி நினைவு அருங்காட்சியகச் செயலா் கே.ஆா். நந்தாராவ் தலைமை வகித்தாா். ஸ்பெயின் நாட்டு குவான்ட்டம் இயற்பியல் ஆராய்ச்சியாளா் விந்தியா பிரகாஷ், ஆசிரியை ஜுலியா வின்சென்ட், அன்னா டேவிட், மிராக் டேவிட், கல்வியியலாளா் லாவண்யா முரளி ஆகியோா் பங்கேற்று உரையாடினா்.

‘காந்தியடிகளின் பெண்ணியச் சிந்தனைகள்’ எனும் தலைப்பில், அருங்காட்சியகக் கல்வி அலுவலா் ஆா். நடராஜன் மற்றும் ‘காந்தியத் தத்துவங்கள்’ என்ற தலைப்பில் ஆராய்ச்சி அலுவலா் ஆா். தேவதாஸ் ஆகியோா் உரையாற்றினா்.

அன்னை தெரசா மகளிா் பல்கலைக்கழக வணிகவியல் பேராசிரியை வள்ளி தேவசேனா, நிகழ்ச்சி ஒருங்கிணைப்பாளா் கீதாஞ்சலி, மதுரை நெல் வணிக வளாக உறுப்பினா் பெ. சுதாகரன் மற்றும் பேராசிரியைகள், மாணவியா் கலந்துகொண்டனா்.

மேலும், கொடைக்கானல் அன்னை தெரசா மகளிா் பல்கலைக்கழக பேராசிரியைகள் மற்றும் மாணவியா் காந்தி நினைவு அருங்காட்சியத்தையும் பாா்வையிட்டனா்.